2025-2026 оны хичээлийн шинэ жилийн бэлтгэл ажлын хүрээнд нийслэлээс сургууль, цэцэрлэгийн бэлэн байдал, барилгын явц, урсгал засварын ажилд хяналт тавин, асуудлыг шийдвэрлэн ажиллажээ. Энэ хүрээнд боловсролын салбарт 402 тэрбум төгрөгийн хөрөнгө оруулалт хийсэн талаар нийслэлийн Засаг даргын орлогч А.Амартүвшин мэдээлэл өглөө.

Нийслэлийн Засаг даргын орлогч А.АмартүвшинТэрээр “Хичээлийн шинэ жилийн бэлтгэл ажлын хүрээнд нийслэлээс чиг үүргийнхээ хүрээнд олон ажлыг хийсэн. Тухайлбал:

• Сургууль, цэцэрлэгийн урсгал зардалд 108 тэрбум төгрөг
• 22 байршилд газар чөлөөлтөд 70 тэрбум төгрөг
• Сургууль, цэцэрлэгийн барилгын ажилд 198 тэрбум төгрөг
• Сургууль, цэцэрлэгийн их засварт 20 тэрбум төгрөг,
• Сургуулийн уурын зуух болон нэмэлт шугам, сүлжээний засварт Засаг даргын нөөцөөс 6.2 тэрбум төгрөгийг тус тус зарцуулсан.

Ийнхүү боловсролын салбарт нийт 402 тэрбум төгрөгийг нийслэлийн төсвөөс гарган шийдвэрлээд байна.

Сургууль, цэцэрлэгийн сандал, ширээ, ор, дэр, тоног төхөөрөмж зэрэг тохижилтыг шийдээгүй асуудал гарсан. Сүүлд гэхэд л СХД-ийн 62 дугаар сургууль дээр ажиллахад барилгын зураг төслийн ажлын эх хувь нь Боловсролын яаманд хүргэгдээд алга болсон. Тиймээс тус сургуулийг есдүгээр сарын 1-нд улсын комисст хүлээлгэн өгөх ажил аравдугаар сарын 1-нд болж, хойшлогдсон. Анги, танхим нь мөн л ширээ, сандалгүй байна.

Мөн Боловсролын сайд хувийн хэвшлийн 180 гаруй сургуульд 38 тэрбум төгрөгийн хувьсах зардал өгөх гэж байна. Үүнээс урьтаж улсын сургуульд хөрөнгө оруулалт хийж, хүүхдүүд суралцах таатай орчныг бүрдүүлэх, сургалтын чанарыг дээшлүүлэхэд төсвөө зарцуулах хэрэгтэй. Боловсролын тэгш бус байдлыг ингэж дэмжиж болохгүй” гэв.

Эх сурвалж: НЗДТГ