УИХ-ын гишүүн Х.Булгантуяа нарыг Төрийн эрх мэдлийг хууль бусаар авах, саатуулах гэсэн зүйл ангиар Тагнуулын байгууллагаас шалгаж байгаа бөгөөд тэрбээр яллагдагчаар татах тогтоолтойгоо танилцахгүй, мөрдөн шалгах ажиллагаанд саад учруулаад байгаа талаар бид өмнө нь мэдээлж байсан билээ.

Тодруулбал,УИХ-ын дэд дарга асан Х.Булгантуяа, Төрийн байгуулалтын байнгын хорооны дарга Ц.Сандаг-Очир, УИХ-ын гишүүн П.Сайнзориг нар нь УИХ-ын чуулганы нэгдсэн хуралдаан болон ТББХ-ны хурлаар Ерөнхий сайдыг огцруулах асуудлыг хэлэлцэхдээ Үндсэн хууль зөрчсөн байдаг.

Улмаар Тагнуулын байгууллагаас дээрх нэр бүхий хүмүүсийг Үндсэн хууль зөрчиж, төрийн эрх мэдлийг хууль бусаар авах, саатуулах гэсэн зүйл ангиар шалгаж, яллагдагчаар татсан юм. Гэвч Х.Булгантуяа нь яллагдагчаар татах тогтоолтойгоо танилцахгүй, мөрдөгчийн дуудсан цагт ирэхгүй, мөрдөн шалгах ажиллагаанд саад учруулах болсон байна.

Тэгвэл УИХ-ын гишүүн Х.Булгантуяаг УИХ-ын гишүүн Э.Болормаатай ижил шүүхийн шийдвэрээр албадан ирүүлж магадгүй байна.

Тодотговол,УИХ-ын гишүүн Э.Болормааг сонгуулийн хууль зөрчсөн хэмээн цагдаагийн байгууллагаас шалгаж, яллагдагчаар татсан байдаг. Гэвч тэрбээр УИХ-ын гишүүн Х.Булгантуяа шиг яллагдагчаар татах тогтоолтойгоо танилцахгүй, мөрдөгчийн дуудсан цагт ирэхгүй байсан тул шүүхээс Э.Болормааг албадан ирүүлэх шийдвэрийг гаргаж, энэ дагуу тэрбээр яллагдагчаар татах тогтоолоо өөрийн биеэр гардаж авсан юм.

Тэгвэл энэ удаад УИХ-ын гишүүн Х.Булгантуяаг мөн адил прокурорын хүсэлтээр шүүхээс албадан ирүүлэх шийдвэрийг гаргаж магадгүй байна.

Эрүүгийн хэрэг хянан шийдвэрлэх тухай хуулийн 31.3 дугаар зүйлийн 1 дэх хэсэгт "Мөрдөгч эрүүгийн хэрэг үүсгэж яллагдагчаар татах тогтоолыг прокуророос хүлээн авсан даруй дуудан ирүүлсэн сэжигтэнд танилцуулж, хувийг гардуулан өгнө. Төрийн нууцад хамаарах хэргийн яллагдагчаар татах тогтоолыг яллагдагч, түүний хууль ёсны төлөөлөгч, өмгөөлөгчид гардуулахгүйгээр танилцуулна" гэжээ.

Мөн хуулийн 12.3 дугаар зүйлийн 1 дэх хэсэгт "Гэрч, хохирогч, иргэний хариуцагч, шинжээч, яллагдагч, шүүгдэгчийг прокурор, шүүхийн мэдэгдэх хуудсаар дуудахад хүндэтгэн үзэх шалтгаангүйгээр хүрэлцэн ирээгүй бол шүүх өөрийн санаачилгаар, эсхүл прокурорын хүсэлтийн дагуу албадан ирүүлэх тухай шийдвэр гаргана" хэмээн тус тус заажээ.