Зам, тээврийн салбарт ахиж дөхөж байгаа зүйл цөөнгүй байгааг бид мэднэ. Тэр тусмаа хаврын улирал аль эрт эхэлж, замын салбарын ажил ид дундаа өрнөж байна. Тухайлбал, Багахангай-Хөшигтийн хөндийн төмөр замын бүтээн байгуулалт ахиц дэвшилтэй явж байгаа бөгөөд уг төмөр замын бүтээн байгуулалтын ажлыг ирэх есдүгээр сарын 1 гэхэд дуусгах төлөвлөгөөтэй ажиллаж байгааг салбарын сайд нь мэдээлнэ лээ. Энэ замыг тавьснаар Улаанбаатар хот, хүн амын төвлөрөл дундуур аюултай ачаа дамжин өнгөрөхгүй болно гээд хүн амын аюулгүй байдлыг хангахаас эхлээд олон давуу талтай.

Үүнээс гадна уул уурхайн бүс нутагт баригдаж байгаа төмөр замын болон автозамын бүтээн байгуулалтын ажлуудыг дурдах нь илүүц хэрэг. Харин энэ мэт олон бүтээн байгуулалтаар дамжуулан, ашиг хонжоо хайсан нөхөд цөөнгүй байгааг нуух юун. Харин “Сайны хажуугаар саар” гэгчээр бүтэж байгаа зүйлийг харлуулах явдал мэр сэр байгааг Зам, тээврийн хөгжлийн сайд Б.Дэлгэрсайхан хэвлэл мэдээллээр дамжуулан, олон нийтэд хандан мэдээлэл өглөө.

Энэ үеэр Б.Дэлгэрсайхан сайд “Намайг гүтгэж харлуулах ажлыг "Смарт эко транс" компанийнхан зохион байгуулж байгаа. Учир нь Гашуунсухайтаас Цагаан хад орох 19.2 км авто замыг "Смарт эко транс" гэдэг компани дур мэдэн авч, асфальтаар хуччихаад үүнийхээ зөвшөөрлийг өг гэдэг шаардлагыг надад удаа дараа ирүүлсэн. Улсын замыг хувийн компанид шилжүүлэх боломжгүй. Хэрвээ би энэ замыг хувийн хэвшлийн компанид шилжүүлбэл өөрөө хуулийн хариуцлага хүлээнэ” хэмээсэн.

Үүнийг тодотговол, өнгөрөгч гуравдугаар сард Зам тээвэр, хөгжлийн сайд Б.Дэлгэрсайхан, Эрүүл мэндийн сайдаар ажиллаж байсан Ж.Чинбүрэн, УИХ-ын Эдийн засгийн байнгын хорооны дарга Р.Сэддорж нар Цагаан хадны нөхцөл байдалтай танилцсаныг санаж байгаа байх.

Энэ үеэр тээвэрчид “Смарт Эко Транс” компани Гашуунсухайт боомтод олгосон газрыг ашигласан хэвээр байгааг хэлээд цаашид тус компанийг яах эсэхийг тодруулахад Зам, тээвэр хөгжлийн сайд Б.Дэлгэрсайхан “Энэ компанийн бүх ажлыг зогсоосон” гэж мэдэгдэж байв. Гэтэл "Смарт эко транс" компани давуу эрхтэйгээр өнөөдрийг хүртэл үйл ажиллагаагаа явуулах төдийгүй “Энэ замыг бид авах ёстой” хэмээн хэвлэл мэдээллээр “бөөлж” байгааг юу гэх вэ.

Уг нөхцөл байдлыг эргэн сануулахад Засгийн газрын гуравдугаар сарын 4-ний өдрийн хуралдаанаар “Смарт Эко Транс” компанид олгосон зөвшөөрийг цуцалж, “Газар ашиглах эрх олгох тухай” Байгаль орчин, уур амьсгалын өөрчлөлтийн сайдын үүрэг гүйцэтгэгчийн 2025 оны зургаадугаар сарын 13-ны өдрийн А/618 дугаар тушаалыг хүчингүй болгосон байдаг.

Гэтэл бүрэн улсын Засгийн газраас ч илүү эрх мэдэлтэй хувийн компани салбарын сайдыг нь ил далд шантаажилж, хэвлэл мэдээллээр харлуулан, засгийн шийдвэрийг үл тоож байгааг Ерөнхий сайд Н.Учрал болон холбогдох газар анхааралдаа авах хэрэгтэй. Захын нэг хувийн хэвшлийнхэн улсын өмчийг минийх хэмээн дур мэдэн үйл ажиллагаа явуулаад байвал энэ улс орон юу болох вэ.

Мөн үеэр Б.Дэлгэрсайхан сайд “Би С.Баярын Засгийн газрын үед зөвшөөрөл авч анх удаа хувийн төмөр зам барьж байсан түүхтэй. Өөрөөр хэлбэл, 20 жилийн өмнө хувийн төмөр зам барьж байсан. Энэ үе хувийн төмөр зам бүү хэл хувийн авто зам ч байгаагүй. 2008 онд баригдсан 98.2 км төмөр бий болсноор манай стратегийн орд илүү үнэ цэнтэй болсон. Дэд бүтэцгүй ямар ч орд үнэ цэнгүй гэдгийг дэлхий нийтээрээ мэдэж байгаа. Энэ дэд бүтэц бол Монголын дэд бүтэц. Төр хяналт тавина. Улсын төмөрлөгийн үйлдвэрийн бүтээгдэхүүнийг явуулахгүй байна гэдэг худлаа мэдээлэл. Үнийг улс тогтоодог болохоос улсын, хувийн компани тогтоодоггүй” хэмээсэн юм.

Tumen.mn