Мьянмар улсын Мандалай муж дахь үнэт чулууны олборлолт, арилжааны төв Могокоос 11,000 каратын буюу 2.2 килограмм жинтэй маш том бадмаараг чулуу олдсоныг тус улсын Засгийн газар зарлажээ. Ягаавтар улаан өнгөтэй тус үнэт чулуу нь “Ер бусын том хэмжээтэй, олоход хэцүү, маш ховор эрдэнэ” хэмээн өнгөрсөн дөрөвдүгээр сард шинээр бүрдсэн, цэргийн дэмжлэгтэй Засгийн газрын харьяа Мэдээллийн яам мэдэгдэлдээ дурдсан байна. Өнгө, чанарыг нь харгалзан үзвэл тэрхүү бадмаараг 1996 онд ижил газраас олдсон 21,450 каратын бадмааргаас илүү үнэ цэнтэй гэж үзэж байгааг мөн онцолжээ

Мэдэгдэлд үнэт чулууг хэн олсон тухай, мөн хэр хэмжээний үнэ хүрэх талаар тооцоолол дурдаагүй байна. Сүүлд 2015 онд 25.59 каратын Бирм бадмаараг чулуу Женевт болсон “Sotheby’s”-ийн дуудлага худалдаагаар 30.39 сая ам.доллароор зарагдаж байв. Мьянмар улс үнэт чулуу, хашийн ихээхэн нөөцтэй ч олон жил үргэлжилсэн иргэний дайн, цэргийн дарангуйллын дэглэмийн улмаас эдийн засаг нь туйлдаж, хууль бус олборлолт газар аваад байгаа. Мандалай мужийн Могокоос өмнө нь том хэмжээтэй үнэт чулуу цөөнгүй олдож байсан бөгөөд тухайлбал: 1990 онд 496 каратын бадмаараг, 2022 онд 2789 каратын бадмаараг тус тус олдсоныг албаны мэдээлэлд дурджээ