Эзэн Богд Чингис хааны мэндэлсний 864 жилийн ой, Монгол бахархлын өдрийг тохиолдуулан Улсын Их Хурлын хүндэтгэлийн хуралдааныг зохион байгуулсан билээ. Энэ үеэр УИХ-ын дарга С.Баярцогт 126 гишүүнд гүйлгээнд хүчин төгөлдөр бус дурсгалын 100,000 төгрөгийн дэвсгэртийг мэндчилгээний хамт гардуулсантай холбоотой шүүмжлэл гараад буй. Их Монгол Улс байгуулагдсаны ойд зориулсан хүндэтгэлийн чуулганы үеэр гишүүд, зочдод гардуулсан бэлэгтэй холбоотой шүүмжлэлд УИХ-ынТамгын газрын ХМОНХГ-ын дарга М.Амарбаяр тайлбар өглөө.

Түүний мэдээлснээр, УИХ-ын дарга хүндэтгэлийн чуулганд оролцсон гишүүд, зочдод ширээний жижиг төрийн далбаа болон 100 мянган төгрөгийн дурсгалын мөнгөн тэмдэгт гардуулсан байна. Үүнийг “УИХ-ын дарга 100 мянган төгрөг тараалаа” хэмээн тайлбарлаж буй нь бэлгийн зориулалтыг буруу ойлгуулж байгааг тэрбээр хэлжээ.

М.Амарбаяр тайлбарласнаар, уг мөнгөн тэмдэгтийг төгрөгийн 100 жилийн ойд зориулан Монголбанк гаргасан бөгөөд бараа, үйлчилгээний төлбөр тооцоонд ашиглах боломжгүй, зөвхөн бэлэг дурсгалын зориулалттай аж.

Түүнчлэн ийм төрлийн дурсгалын зүйлийг өмнө нь ч төрийн арга хэмжээний зочдод бэлэг болгон өгч байсан хэмээн мэдээлэв. Монголбанкнаас эрхлэн гаргадаг дурсгалын зоос, мөнгөн тэмдэгт нь марк, ил захидлын адил түүхэн үйл явдал, ойг дурсгах зориулалттай болохыг тэрбээр онцоллоо.