АН-ын ҮЗХ-ны гишүүдийн нөхөн сонгууль хэрүүл маргаан дагуулсаар байна. Фракцуудын зөрчил улам хурцдах төлөвтэй. З.Энхболд дарга нь Шонхор фракцийг толгойлж байсан болохоор дүүрэг, аймгийн АН-аас ҮЗХ-нд орох хүмүүсийг энэ фракцаас голцуу оруулах гэснээс болоод маргаан ширүүсчээ. Үүнээс үүдээд зарим дүүргийн АН-ын дарга нарын “нууц” нь нийтэд дэлгэгдэж, хуучин “шарх” хөндөгдөж эхэллээ.
Баянзүрх дүүргийн Засаг дарга Д.Пүрэвдаваа төрийн албанд гурван жил ажиллааггүй нь одоо тодорхой болж байна. Уг нь түүнийг анх 2012 оны сонгуулийн дараа Нийслэлийн Засаг даргын орлогчоор томилогдох үед энэ тухай тус дүүргийн АН-ын гишүүд ярьцгааж л байсан юм билээ. Гэвч хүч түрсээр хотын орлогч дарга болж “мандан”, удалгүй Баянзүрх дүүргийн Засаг дарга болсон байлаа.
Ер нь тэр үед болж өнгөрсөн орон нутгийн сонгуулиар иргэдийн сонгох, сонгогдох эрхэнд хамгийн увайгүйгээр халдсан хүн бол Д.Пүрэвдаваа байсан гэхэд хэтрүүлэл болохгүй болов уу. Тэр дүүргийнхээ ихэнх хороодод “тусгай төлөөлөгч” маягийн хүн томилж сонгуулийн санал хураалтанд өөрийн намын “эсэргүү” нарыг оролцуулахгүй байх бүх арга хэмжээг зохион байгуулсан гэж шударга гишүүд нь хэлж байлаа. Ялангуяа МоАХ-ны партизануудыг хараад түүний толгой молгойны хамаг үс босоод ирдэг аж. Хөөрхий муусайн “партизанууд”-ыг тэгтлээ үзэж чадахаа больсны учрыг харин зарим нь одоо л ухаарч байх шиг байна. 1990 оны ардчилсан хувьсгалыг зүрх сэтгэлээрээ дэмжиж, оройлон оролцсон партизанууд бол ямар ч үед шударга үнэний талд баттай зогсож чаддаг төрөлхийн гэмээр онцгой “гень”-тэй хүмүүс л дээ. Тиймээс Д.Пүрэвдаваад адлагдах болсон юмсанж.
Орон нутгийн сонгуулиар хаалгаа хав дарж байгаад сонгууль явуулсан хороод ч цөөнгүй. Мөн өмнөх жилүүдэд нь хамгийн сайн ажилласан өөрийн намын гишүүн хорооны Засаг дарга, иргэдийн нийтийн хурлын тэргүүлэгчдийн дарга нарыг хавчин гадуурхаж, ажилгүй болгож хаясан гэдэг. Намчирхалгүйгээр жинхэнэ иргэний ардчиллын хэв маяг, зарчим дор шударгаар сонгууль явуулаад журмын нөхдөө жийсэн бол ч яахав, шударга ёсны асуудал гээд чимээгүй болох байсан биз. Гэвч эсэргээрэй, бүх ажиллагаа Д.Пүрэвдаваагийн дэглэлтээр болж өнгөрсөн байлаа. Түүний “хайрцаглалт”, тойрон хүрээллээр хорооны Засаг дарга болсон нөхөд дотор одоо боловсролгүй хүн ч нэлээд хэд бий. Үсчин, гуталчин нөхөр шууд засаг захиргааны анхан шатны энэ албанд шууд ногоон гэрлээр очихыг хараад инээд доог болгохоос яахав.
Баянзүрх дүүргийн АН-ын шинэчлэлийн хороо саяхан байгуулагдаж иймэрхүү нүдний булай бологсдоос намаа цэвэрлэхийг зорьж буй ажээ. Чин шударгаар асуудалд хандаж чадвал сайн хэрэг. Нам цэвэр бол төр цэвэр байх учиртай. Өнгөрсөн 20 гаруй жилд намуудын дүрэмгүй тоглоом, хот хөдөөгүй хийрхсэн намчирхал дунд жирийн иргэд маань дэндүү золиослогджээ. Тиймээс Баянзүрх дүүргийн АН-аас эхлээд шинэчлэх аян өрнөж буй бол дэмжихгүй хэн байх билээ. Засаг дарга Д.Пүрэвдавааг төрийн албанд гурван жил ч ажиллаж үзээгүйг мэдсээр байж Дүүргийн Засаг дарга болгосон хотын захирагч Э.Бат-Үүл одоо эрүүл саруул ухаанаар асуудалд хандах ёстой болж байна. Д.Пүрэвдаваа урьд нь баар, зоогийн газар ажиллуулж яваад л нэг сайхан нартай өдөр энэ дүүргийн АН-ын дарга болсон байлаа. Дээрээс татах хүч сайтай байсных биз.
Баянзүрх дүүргийн АН-ын шинэчлэлийн хорооноос Д.Пүрэвдавааг урьд нь төр ажиллаж байгаагүй хүн гэдэг үндэслэлээр Захиргааны хэргийн шүүхэд өгч байна. Шүүх түүний төрд хэдэн жил ажилласныг үнэн зөв тогтоож өгөх байх. Ямартай ч тус хорооны зохицуулагч Б.Мөнх-Эрдэнэ түүний төрд ажилласан цаг хугацааг Дүүргийн Засаг дарга болох боломжгүй гэж тайлбарлаж байна. Мөн тэрбээр, АН-ын дотоод сонгуулийн талаар санал гомдол бичиж очсон хүний материалыг Д.Пүрэвдаваа нь шүүрч аваад ураад хаячихдаг гэж хэлж байна. Жил гаруйн өмнө бас нэгэн “партизан” эр Засаг дарга Пүрэвдаваа дээрээ намын дотоод ардчилал муу, дүрэм хэрэгжихгүй байгаа зэргийг танилцуулах санаатай ороод өрөөнөөс нь хөөгдөөд гарсан гэнэ лээ. Д.Пүрэвдаваагийн тойрон хүрээлэгчдээс тус дүүргийн Үйлдвэрлэл худалдааны хэлтсийн дарга Халиунаа мэтийн хүмүүс нь ИТХ-ын Батхүү гэгчийн эхнэрийн дүү ч гэлүү, охин ч гэл үү, энэ мэтийн цус ойртолт тэнд зөндөө, зөндөө. Иймээс одоо жирийн шударга гишүүд нь Д.Пүрэвдавааг Дүүргийн АН-ын дарга, Дүүргийн Засаг даргын суудлаас хөөгөөд явуулахыг хүсч байгаа ажээ. Аль нэг даргад тэд дургүйдээ бус ерөөсөө шударга бусад дургүйцсэндээ тэр биз.
Б.Отгонбаяр
Эх сурвалж: Tumen.mn
