АНУ Украинд зэвсэг нийлүүлэхээр төлөвлөсөн тухай мэдээллийн дагуу тус улсын эрх баригчид албан ёсны мэдэгдэл гаргажээ. Цагаан ордон болон Батлан хамгаалах яамны удирдлагааас зохион байгуулсан хэвлэлийн бага хурал дээр Украин дахь хямралыг зохицуулах дипломат арга хэрэгслийг чухалчилж байгааг мэдэгдсэн байна. Үүнээс гадна энэ долоо хоногийн эцсээр Ерөнхийлөгч Б.Обама Германы канцлер А.Меркельтэй энэ тухай хэлэлцэнэ. Цагаан ордны албан ёсны төлөөлөгч Жош Эрнестээс Украины талд зэвсэг нийлүүлэх талаарх байр суурийг асуухад “АНУ В.Путиний дэглэмийг Орост ганцаардуулах бодлогоо үргэлжлүүлнэ” гэдгийг өгүүлж, энэ бүхэн эцэстээ Украины талаар баримтлах Оросын байр суурийг өөрчлөх зорилготойг өгүүлжээ. Үүнээс гадна энэхүү арга барил нь улс орнуудын бүрэн эрхт, газар нутгийнх нь халдашгүй байдлыг хүндэтгэх зарчмын хүрээнд олон улсын хамтын нийгэмлэгийг нэгтгэсэн гэдгийг хэлсэн байна. Хурлын үеэр Пентагоны төлөөлөгч контр-адмирал Жон Кирби АНУ-ын эрх баригчид Украины талд зэр зэвсгээс бусад хэлбэрээр тусламж үзүүлж байгааг дурдаж, цаашид ч гэсэн энэ бодлого хэвээр байна гэдгийг мэдэгджээ. Саяхан“Нью-Йорк таймс” сонинд АНУ-ын эрх баригчид Украинд олгох тусламжаа өргөтгөж, зэвсэг нийлүүлэх тухай хэлэлцэж эхэлсэн тухай мэдээлсэн нь цаанаа учиртай. Энэ сонин нь Вашингтоны эрх баригчдын дуу хоолой болж, зарим нэг маргаантай асуудлын тухай мэдээллийг урьдчилан цацаж, бусад талын байр суурийг тандах хэрэгсэл болдог. Зэвсэг нийлүүлэх тухай асуудлыг Украинд өнөөдөр очиж буй АНУ-ын Төрийн нарийн бичгийн дарга Ж.Керри, Зэвсэгт хүний жанжин штабуудын хорооны тэргүүн генерал М.Демпси нар Украины талтай хэлэлцэх нь гарцаагүй. Үүнээс гадна Украины Ерөнхийлөгч П.Порошенко НАТО-гийн ерөнхий нарийн бичгийн дарга Йенс Столтенбергтэй ойрын өдрүүдэд уулзахаар төлөвлөсөн. “Нью-Йорк таймс” сонинд гарсан мэдээлэл Украинд зэвсэг нийлүүлэх эсэх талаар олон улсын хүрээнд маргаан дэгдээсэн. Тухайлбал, Германы канцлер А.Меркель тус улс зэвсэг нийлүүлэхгүй гэдгийг хатуу мэдэгджээ. Энэ талаар Европын томоохон орнууд болон АНУ-ын байр суурь зөрөлдөөнтэй байгаагаас нэгдсэн бодлого боловсруулж чадсангүй. АНУ-ын тал саяхныг хүртэл Украины Зэвсэгт хүчинд сум нэвтэрдэггүй хантааз, шөнийн дуран, холбооны болон инженерийн хэрэгсэл, эм тариа нийлүүлж байсан. Дээр нь барууны хувийн хамгаалалтын компанийн хөлсний цэргүүд Украины талд олноороо байлдаж, барууны зэвсэг хэрэгсэл хэрэглэж байгаа тухай Оросын талыг баримтлагч салан тусгаарлагчид мэдээлдэг.
Эх сурвалж: Unen.mn
