Сонгинохайрхан дүүргийн 9 дүгээр хорооны  нутаг дэвсгэрт айлын хашаанаас олдсон “Цорж” Санжжавын  занданшуулсан шарилыг засч сэргээхээр Шүүхийн шинжилгээний төвөөс Гандантэгчинлэн хийдэд  аваачаад байгаа ажээ. Хулгайчийн гараар орж сүйтгэгдэх гэж байсан энэхүү шарил нь 200 орчим жилийн өмнө Архангай аймгийн Цахир сумын нутагт амьдарч байгаад жанч халж, олноо “Өвгөн Гэсэр ламтан” хэмээн өргөмжлөгдсөн Чүлтэмжамцын  гарын шавь байсан гэдэг нь одоо нэгэнт тодорхой болоод байгаа юм.  Нутгийнхан нь гэрээслэл ёсоор “Хөх нуурын эхний гурван оньсын сэтэрхий дээр нутаглуулаарай” гэснийх нь дагуу Тэрхийн голын хойд эрэг дэх Байцын дөрөлж хэмээх газарт  багш шавь хоёрыг  хамтад нь “бунхалж”, шүтэн биширч иржээ. Тэнд Байцын дуганыг Гэсэр ламтан өөрийн биеэр барьж байгуулсан гэдэг.  Тиймээс Цорж” Санжжавын занданшуулсан шарилыг энэ нутагт нь, багшийнх нь дэргэд буцаан залж, дуган хийд байгуулах  ажилд Засгийн газраас 164 сая төгрөг зарцуулахаар шийдвэрлэв.  Бүрэн хэмжээний хийд байгуулж, “Цорж” Санжжав  нарыг дэлхий нийтэд сурталчлахад энэ мөнгө хүрэлцэхгүй ч эхний ээлжинд  ийнхүү шийдсэн байна. Цаашдаа ОХУ-ын Буриадын нутаг байгаа Итгэлт хамбын дуганын дайтай   жуулчдыг татах зорилго тавьж буй аж. Харин “Цорж” ламын занданшуулсан шарилыг хулгайлж, 300 сая төгрөгөөр зарах гэж байсан “Э” гэгчийг мөрдөн шалгах ажиллагаа үргэлжилж байна.

Б.Баяр 

Эх сурвалж: Tumen.mn