АН-аас УИХ-ын сонгуульд нэр дэвшихээр горилогчид  зарим нь  мултарч, намын удирдлагадаа ихэд гомдож яваа бол  тойглосон  тойргоосоо  төөрөлдсөн  хэсэг бас байна. Тэднийг “чихээснийхэн” гэвэл тохирох мэт.  Тухайлбал хуульч, өмгөөлөгч Д.Оросоогийн хувьд   С.Эрдэнийн  хүн. Тэрбээр С.Эрдэнийн өмгөөлөгчөөр ажиллаж байгаад Баянгол дүүргийн Засаг даргаар  томилогдож байв. Өнгөрөгч сонгуульд өнжсөн  тэрбээр энэ удаа Баянгол дүүргээсээ нэр дэвших бодолтой явсан ч  боломж олдсонгүй. Харин Орхон аймаг руу цөлөгдсөн. Сүүлд Монгол Улсын сайд асан М.Энхсайханы хэрэгт өмгөөлөгчөөр ажиллаж  байгаа нь олон нийтийн анхаарлын төвд байгааг эс тооцвол тэр Орхон аймагт цоо шинэ хүн. 

Дараагийнх нь Да.Ганболд. Улстөрөөс удтал завсарлага авсан, хууль хяналтын байгууллагад шалгагдаж байгаа түүнийг Хөвсгөлд ногоон гэрлээр нэр дэвшүүлсэнд дургүйцэгсэд олон байна. Өндөр албан тушаал хашиж байхдаа гадаадад оффшор данс нээсэн, хэт хөрөнгөжсөн,  албан тушаал хээл хахуулийн хэрэгт холбогдон шалгагдаж байгаа, улсад их хэмжээний хохирол учруулсан  гэх хар мөртэй. “Чингүүнжавын нутагт хятад цустай хүн дэвшүүлэхгүй”  гэх үг эсрэгээрээ болов.  Томоохон эдийн засагтай холбоотой бүхий л хэргүүдтэй тэр нэр холбогддог. Хамгийн сүүлийн үеийн жишээг л авья. Түүнийг “Эрдэнэс-Оюутолгой” компанийн гүйцэтгэх захирал байхад Дубайн гэрээ байгууллагддаг. Нийтлэлч Баабар түүнийг “Монгол улсад 176 их наяд төгрөгийн хохирол учруулсан этгээд” хэмээн цоллож байсан удаатай. Харин дараа нь “Эрдэнэт”-ийн 49 хувийг төлөөлөн тус компанийн ТУЗ-д сууж байсан нэгэн. 

Үргэлжлүүлээд  олон жил онцгой байдлын газраар  овоглож явсан Бригадын генерал М.Энх-Амарыг Багануур, Багахангай, Налайх буюу жижиг 3 тойрогт цөлжээ. Түүний хувьд өмнө нь сонгуульд нэр дэвшиж байсан туршлагатай, 2019 онд “бригадын генерал” цолыг Ерөнхийлөгч Х.Баттулгаас гардаж авч байсан, 2009 оноос хойш Улсын онцгой комиссын нарийн бичгийн даргаар ажиллаж байгаа нэгэн. Түүний хувьд Баянзүрх дүүргээс  нэр дэвшихээр  эртнээс судалж  байсан боловч  ийнхүү жижиг 3 тойрог руу цөлөгдсөн юм. 

Хүссэн хүсээгүй тойрог нь өөрчлөгдсөн хүмүүсийн бас нэг жишээ бол С.Жавхлан. Тэрбээр өөрийн сонгогдсон  Баянзүрх дүүргээ яагаад сольсон талаарх сэтгүүлчийн асуултад хэсэг бодосхийгээд “Тавилан л юм даа” гэх хариултаас АН доторх нэр дэвшүүлэлт ямархуу өнгө аястай болж өрнөснийг ойлгож болно. 

Мөн Булганд горилж байсан З.Энхболдын хүн сэтгүүлч О.Батхандыг Говь-Алтайд, Орхонд горилогч Д.Өсөхбаярыг Булганд, хотын асуудал  ярьдаг хотын дарга асан Э.Бат-Үүлийг Хэнтийд, Хан-Уулд горилж байсан,  нийслэлийн төлөөлөгчөөр 8 жил суусан,  АПУ-ийн П.Батчимэгийг  Дорнодод, НИТХ-ын төлөөлөгч Ц.Одонтунгалагийг өрсөлдөөн ихтэй Баянзүрх дүүрэгт нэр дэвшүүлсэн. Ц.Одонтунгалагийн хувьд Монгол Улсын заан Д.Бумбаярын эхнэр бөгөөд Увс аймгаас нэр дэвшихээр тооцоолж гэр бүлээ орхиод,  тэндээ очиж хагас жил очиж амьдарчээ. Энэ мэт тойрог андуурсан чихээсний нэр дэвшигчид өрсөлдөөнд ямар үр дүн гаргахыг таашгүй. С.Жавхлангийн хэлдэгээр  “Тавилан юм даа”. 

Т.Хэрлэн