Хүн төрөлхтний түүхэнд хамгийн эртний зөрчилдөөн болох Азербайжан, Армени улсуудын газрын маргаан дахин ширүүсэж талууд гал нээлээ. Нагорно Карабах бүс нутагт болж буй тулаанд одоогийн байдлаар 23 хүн амь үрэгдсэн байна.

Нагорно Карабах бүс нь олон улсад Азербайжаны газар нутаг гэж хүлээн зөвшөөрөгддөг ч Армени улсын хяналтад байдаг. Өмнөх ЗХУ-ын нэг хэсэг байсан тус хоёр улс хамгийн сүүлд 1990 оны үед уг маргааны улмаас тулахад хэдэн мянган хүн амиа алдаж байв.

Азербайжаны Ерөнхийлөгч Ильхам Алиев ням гарагт тус бүс нутгийг хяналтдаа байлгана хэмээсэн бөгөөд хэд хэдэн бүс нутагт дайны байдал зарлажээ. Харин Армени улсын Ерөнхий сайд Никол Пашинян ард иргэдээ "эх нутгаа хамгаалах"-ыг уриалаад дайны байдал зарлан, цэргийн дайчилгаа явуулжээ.

Кавказын уулс дахь уг маргаан сүүлийн 30 жилийн турш үргэлжилсэн ба өнгөрсөн долоодугаар сард болсон мөргөлдөөний улмаас 16 хүн амь үрэгдсэн юм.

Кавказын уулсын өмнөд хэсэгт орших тус бүс нутаг нь Каспийн тэнгисээс газрын тос, байгалийн хийг дэлхийн зах зээлд нэвтрүүлэхээр зөөдөг гол хоолой тул мөргөлдөөн дэлхийн эдийн засагт нөлөөлөх эрсдэлтэй.

Туркийн Ерөнхийлөгч Режеп Тайип Эрдоган Азербайжанд туслахаа илэрхийлсэн ба бусад улс орнуудыг эзлэн түрэмгийллийн эсрэг тэмцэхийг уриалав.

Харин Арменийн холбоотон ОХУ, Франц болон НҮБ-ын нарийн бичгийн дарга Антонио Гутерреш, АНУ, Иран улсууд яаралтай гал зогсоохыг уриалжээ.