Монгол түмэндээ зориулав.


Шуурхай мэдээ

Шинэ оноо илүү өөдрөг, сайхнаар эхлүүлэх 7 арга

Нийтэлсэн: Монгол Хүү | Нийгэм
2020 12 сар 17 ・ 182

 

2020 он хүн төрөлхтний хувьд хамгийн хэцүү он жилүүдийн нэг байлаа. Улс хооронд зорчих байтугай хүн хоорондын зай авах шаардлага тулгарч байна. “Ковид-19” цар тахлын халдвараар сая саяараа өвдөж, улс орон бүр хатуу хөл хорио тогтоон, тахлыг гааруулахгүйг хичээн ажиллаж байгаа билээ. Удахгүй 2020 он улирч, шинэ жил айсуй. Өвчин зовлон, уй гашуу бүхнийг хуучин онтойгоо үдэж, шинэ оноо итгэл найдвар дүүрэн, эерэг бодлоор угтахдаа хүн бүхэн бэлэн байна. Угтан ирэх шинэ оноо илүү сайн сайхнаар өөрчлөхөд туслах 7 аргыг танилцуулж байна.

Тэмдэглэл бичих

 

Өөрт тулгараад буй асуудал, өөрчлөхийг хүссэн зүйлсээ тодорхой болгож тэмдэглэл хөтлөөрэй. Яг юуг өөрчлөхийг хүсч буй тань тодорхой болсон бол түүнийг хэрэгжүүлэх арга замыг хайн олоорой. Яагаад заавал нэгдүгээр сард төлөвлөгөө эхлэх ёстой гэж? Сүүлийн сард ч шинэ дэвтэр эхлэхээс бүү ай. 

Гэртээ их цэвэрлэгээ хийх

 

Асуудлыг тодорхой болгосон бол орчноо өөрчлөхөөс эхлээрэй. Ингэхдээ нэн түрүүнд гэрээ бүрэн цэвэрлэх хэрэгтэй. Удаан хугацаанд төвөг болсон шүүгээг цэгцлэх, эвдэрсэн сав суулгыг сэргээн засварлах зэргээр нүдэнд жижиг мэт харагддаг ч өдөр тутмын амьдралд нөлөөлдөг зүйлсийг цэгцлээрэй.

Эрүүл хооллох

 

Хөл хорио, хязгаарлалтын үед бид бүхэн амьдарч байна. Энэ цаг үеийг эрүүл мэнддээ анхаарал тавих хугацаа болгон ашиглаарай. Herbalife Nutrition Институтын дарга доктор Дэвид Хибер “Дархлааны тогтолцооны хамгийн том хэсэг буюу ойролцоогоор 70% нь хоол хүнс бие махбодид орж ирдэг, орж ирсэн хоол хүнсийг хэрхэн ашиглахыг хянаж байдаг гэдэсний ойролцоо байрладаг. Тиймээс эрүүл амьдралын хэв маягийг баримтлахын зэрэгцээ амин дэм, эрдэс бодис болон шим тэжээлийг зөв хэмжээгээр агуулсан тэнцвэржүүлсэн хоол хүнс идэх нь бидний хувьд маш чухал юм” гэсэн. Тэнцвэртэй хооллох гэдэг нь биедээ авч буй зөвхөн нэг эсвэл хоёр шим тэжээлийг өөрчлөхийг хэлэхгүй. Харин эсийн түвшинд шаардлагатай бүх шим тэжээлийг баттайгаар авч байхын тулд хоолны дэглэмээ бүхэлд нь тэнцвэржүүлэхийг хэлнэ. Дархлааны тогтолцоог бэхжүүлэхдээ уураг, амин дэм, пробиотик, омега-3 тосны хүчил зэрэг тэнцвэржүүлсэн шим тэжээлтэй хоол хүнс сонгож хэрэглээрэй.

Айдсаа даван туулах

 

Огт хийж үзээгүй ч хийхийг битүүхэн хүсдэг зүйлсээ жагсаан бичээрэй. Олон жил сурахыг битүүхэн мөрөөддөг байсан хөгжим тоглох, гадаад хэл сурах, танихгүй хүнтэй харилцах гээд юу ч байж болно. Хамгийн гол нь өөрийнхөө айдсыг даван туулахыг хүсвэл багахан хичээл зүтгэл гаргаж, эхлүүлэхэд л хангалттай.

Дасгал хөдөлгөөн хийх

 

Тогтмол дасгал хөдөлгөөн хийхийг зүрхний эрүүл мэнд, ясны нягтшил, үе мөчний хөдөлгөөн, танин мэдэх чадвар, сэтгэл санаа, бодисын солилцоо сайжрах, булчингийн масс болон хүч нэмэгдэхтэй шууд холбодог. Энэ байдлаар олон давуу талуудыг жагсааж болно. Гэхдээ ийм стресстэй цаг үед тогтмол дасгал хөдөлгөөн хийхийн хамгийн том ашиг тус бол өдөр тутмын ажил, үйлдлийг илүү хялбар болгодог. Дасгал хөдөлгөөн нь танд төвлөрөхөд, ухамсартай байдлаа хадгалахад тусална. Та хаана ч дасгал хийж болно. Тусгай хэрэгсэл бага шаардсан дасгалуудыг мэддэг байхад л хангалттай. Гэртээ хийх боломжтой дасгалуудыг доор тайлбарласан болно. Гэрийн тав тухтай орчинд хийх боломжтой өөр дасгал хөдөлгөөнийг мэдэхийг хүсэж байвал ЭНД дараарай.

Эрүүл, идэвхтэй хэв маягийг хэвшүүлэх

 

2013 оны байдлаар дэлхий даяар 380 сая хүн чихрийн шижинээр өвчилсөн бол энэ тоо 2035 он гэхэд 600 сая хүрэхэд маш ойртоно гэж судлаачид таамаглаж байна. Ази Номхон далайн бүс нь чихрийн шижин өвчинд хамгийн ихээр өртсөн бүс нутагт тооцогдож байгаа юм. ДЭМБ-аас өндөр настай эсвэл чихрийн шижин, уушгины болон зүрх судасны өвчтэй гэхчлэн халдварт бус архаг өвчтэй хүмүүс “COVID-19” цар тахалд өртөх магадлал өндөр байгааг мэдээлсэн. Тиймээс хооллолтоо анхаарч, хөдөлгөөнийг “найзаа” болгож, амьдралын дадал зуршлаа өөрчилж, эрүүл мэндээ хамгаалаарай.

Сайн үйлсийн аянд нэгдэх

 

Цар тахлын улмаас хүнсний аюулгүй байдал хурцадмал болж байна. Энэ оны эцсээр 132 сая хүн хоол тэжээлийн дутагдалд орох магадлалтай байгаа юм. Тиймээс та оны төгсгөлд бусдын сайн сайхны төлөөх аянд нэгдэж, боломжийн хэрээр буян үйлдээрэй. Улаан загалмайн нийгмэлэг, Ид шидийн орон, хүүхэд, ахмадын асрах газар гээд бидний туслалцаа эзэндээ хүрэх газрууд бий шүү дээ. 

 


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй