Миний бага охин маань энэ жил Хөвсгөл аймгийн Мөрөн суман дахь ЕБС-ийн  зургаадугаар ангийн сурагч болоод нэг сар ч болоогүй, дунд хүү маань  12 дугаар ангид суралцаж байна.

Монгол Улсын БШУЯ-ны бодлого орой бүр миний хүүхдийн хичээл, гэрийн даалгавраар дамжин гэрт минь орж ирдэг. Миний хувьд зав л гарвал хүүхдүүдтэйгээ ярилцах, гэрийн даалгаврыг нь хамтарч хийх гэж хичээдэг жирийн нэгэн аав билээ. Боловсролын салбарын бодлогын талаар өөрийн санал бодлоо хэлэхгүй байж чадахгүй энэхүү санаагаа илгээлээ.

Зургаадугаар ангид 16 хичээл үзэж байна. Охин бид хоёрт өөрийгөө хөгжүүлэх цаг байхгүй боллоо. Даалгавраа амжуулаад л таарч байна.

Эцэг эхчүүд бид өөрийн хүүхдээ хэнээс ч илүү мэднэ. Хүүхэд бүхэн адил биш. Өөр өөр удамшил, орчинтой. Өөр өөр авьяас, хүсэл сонирхолтой. Сурах хурд нь ч бас харилцан адилгүй.

Хүүхэд бүр өөр өөр шинэ зүйл сурах, унших, тоглох, авьяасаа хөгжүүлэх түүнийгээ дагаад зарим хичээлд илүү сонирхолтой байх зэрэг та бидний анхаарах асуудал багагүй байна гэж үзэж байна. Гэтэл бидний хүүхдийг сургаж, дүгнэж, зааж байгаа хөтөлбөр миний хүүхэд бид хоёрт үнэхээр хүнд байна. Тиймдээ ч яамны зохиосон хөтөлбөрийн дагуу сургаж чадахгүй нь уучлаарай. Миний хүүхэд тийм супер толгойтой хүүхэд биш. Одоо яах вэ.

Энэ жил уншиж байгаа болон ойрын хугацаанд унших, бие даан сурах гэж төлөвлөсөн олон төлөвлөгөө, номоо орхихоос өөр аргагүйд хүрлээ. Чөлөөт цагаараа интернетээс үздэг үнэгүй онлайн сургалт, янз бүрийн сонирхолтой бичлэг кино бүгд хаагдлаа. Бичээд ч дуусахгүй маш их асуудал байна. Үүнийг яаж зохицуулах вэ.

Надад хариулт өгөөч. БШУЯ-ны дарга нараа, багш эцэг эхчүүдээ.

Хөвсгөл аймгийн Мөрөн сумын иргэн Б.Батнасан