Австралийн Хөрөнгийн биржид бүртгэлтэй “TMK Energy” компани "Гурвантэс XXXV" төсөлдөө нэмж өрөмдсөн "LF-07" цооног нь хий амжилттай олборлож эхэлснийг мэдээллээ. Мөн энэ улиралд тус компани 3.5 сая австрали доллар амжилттай татан төвлөрүүлж, төслөө идэвхтэй урагшлуулах санхүүгийн нөөцтэй болсныг онцолж байна. Тус компани нэмэлт хувьцаа гаргасан нь хувьцаа эзэмшигчид болон мэргэжлийн хөрөнгө оруулагчид дунд ихээхэн эрэлттэй байж, захиалга нь давж биелснийг тодотгожээ. Одоогоор “TMK Energy” нийт долоон цооногоосоо зэрэг хий олборлож эхэлсэн ч олборлолт нь хараахан арилжааны түвшинд хүрээгүй байгаа аж. Өнгөрсөн наймдугаар сарын эхээр тус компани БНХАУ-д төвтэй, зөвлөх үйлчилгээний "JEnergy" компанитай стратегийн хамтын ажиллагааг эхлүүлсэн байна. Энэ хүрээнд төслийн талбайн төлөвлөлт болон шинэ хамтын ажиллагаа эхлүүлэхэд нь туслалцаа үзүүлэхээр байна.