Гэмтэл согог судлалын үндэсний төвийн Сэргээн засах эмчилгээний тасгаас “Дэлхийн хөдөлмөр засалчдын өдөр”-ийг тохиолдуулан гэмтлийн дараах хөдөлмөр заслын тусламж үйлчилгээг таниулах өдөрлөг хийлээ.

“OCCUPATIONAL THERAPY IN ACTION” уриатай энэхүү өдөрлөгөөр дамжуулан бие махбодийн чадвар алдалтыг сэргээх, гар засал, сорвины менежмент, сплинт /туслах хэрэгсэл буюу чиг/ болон хөдөмөр засал эмчилгээний онцлог, багаж хэрэгсэл, түүний ач холбогдлыг эмнэлгийн ажилтан, үйлчлүүлэгчдэд сурталчлан таниулах ажлыг зохион байгууллаа.

Хөдөлмөр заслын тусламж үйлчилгээ нь гэмтлийн дараах сэргээн засах эмчилгээний салшгүй нэг хэсэг бөгөөд үйлчлүүлэгчийн бие махбодь, хөдөлгөөний чадвар алдалтыг сэргээх, өдөр тутмын үйл ажиллагааг сайжруулж, амьдралын чанарыг дээшлүүлэхэд чиглэсэн эмчилгээний чухал төрөл юм.

Тиймээс тус төвд 2022 оны 10 дугаар сараас эхлэн хөдөлмөр заслын тусламж үйлчилгээг нэвтрүүлж, үйлчлүүлэгчийн бүтээмжит хөдөлмөр (ажил мэргэжил, суралцах), чөлөөт цагийн хөдөлмөр (хобби), амралт (нойр), өдөр тутам өөртөө үйлчлэх хөдөлмөр (хооллох, хувцаслах, бие засах, шилжилт хөдөлгөөн, ариун цэвэр сахих) зэрэгт сургах, нийгэм олон нийтийн амьдралд тэгш оролцох боломжийг хангахад дэмжлэг үзүүлэн ажиллаж байна.

Түүнчлэн осол, гэмтлийн дараах хөдөлмөрийн тэнцвэрт байдлын алдагдал, амьдралын шилжилтийн үеийн хямрал, сэтгэл зүй, нийгмийн харилцаа, ажиллах орчны эргономик тохиргоо зэрэг шаардлагатай асуудалд үнэлгээ хийж, тусламж үйлчилгээ үзүүлдэгээрээ энэхүү эмчилгээ нь онцлогтой юм.