"БАГШ, ЭМЧ НАРЫН ЦАЛИНГ НЭМЭХИЙН ЗЭРЭГЦЭЭ МАЛЧДЫНХАА ОРЛОГЫГ ДЭМЖИХ БОДЛОГОО ҮРГЭЛЖЛҮҮЛЭХ НЬ ЧУХАЛ"

УИХ-ын Байгаль орчин, хүнс, хөдөө аж ахуйн байнгын хорооны хуралдаанаар 2026 оны төсвийн хэлэлцүүлэг явагдлаа. Энэ үеэр “Шинэ хоршоо” хөдөлгөөний хөнгөлттэй зээлийг хасах саналыг УИХ-ын гишүүн Ч.Лодойсамбуу, С.Цэнгүүн нар гаргасан юм. Үүний хариуд УИХ-ын гишүүн, Шадар сайд С.Амарсайхан өөрийн байр сууриа илэрхийлж, дараах тайлбарыг өглөө.

Тэрбээр “Багш, эмч нарын цалинг нэмэгдүүлэх бодлогыг би бүрэн дэмжиж байгаа. Монгол Улсын ирээдүйг бүтээгч хоёр чухал хүчин зүйл бол оюун ухаан ба эрүүл мэнд юм. Багшийн цалин бол тоо төдий зүйл биш. Харин багшийн оюуны үнэлэмж, хүүхдийн ирээдүйн хөгжилтэй шууд холбоотой. Эмч, эмнэлгийн ажилчдын цалин бол эрүүл Монголын баталгаа, мөн улсын хөгжлийн үндэс суурь болсон чухал зүйл. Энэ салбарын ачааны хүндийг эмч нараас гадна сувилагч, асрагч, жирийн ажилчид үүрч явдаг учраас тэдний цалин урамшууллыг нэмэгдүүлэх асуудлыг бас орхигдуулж болохгүй. Энэ хоёр салбар бол Монгол Улсын хөгжлийн чанар, өрсөлдөх чадварыг тодорхойлох гол үнэт зүйл юм. Гэхдээ алс хязгаар нутагт үржих баялаг болсон мал сүргээ адгуулан маллаж, эх орныхоо өнцөг булан бүрд борви бохис хийлгүй зүтгэж яваа малчдын хөдөлмөрийг дэмжих бодлого бас чухал. Малчид бол Монголын язгуур өв соёл, уламжлалыг хадгалж, хүнсний үйлдвэрлэлийн нийлүүлэлтийн цөм нь болж яваа хүмүүс.Монгол Улсын эдийн засгийн тогтвортой өсөлт, нийгмийн баталгааг хангах, өрсөлдөх чадварыг сайжруулахад малчдын үүрэг чухал ач холбогдолтой. Тиймээс малчдын орлогыг нэмэгдүүлэх, амьжиргааг дэмжих зорилгоор эхлүүлсэн "Шинэ хоршоо" хөдөлгөөнийг үргэлжлүүлэх хэрэгтэй. Бид бодлого гаргахдаа аливаа асуудлыг салангид биш, харин цогц байдлаар авч үзэх нь зүйтэй. Нэг салбарыг дэмжих гээд нөгөөг нь унагааж, устгаж, нэгээс нь бодлогогүйгээр хасаж нөгөөд нь нэмдэг байдал зөв шийдэл биш. Бид бүх салбарыг тэнцвэртэй хөгжүүлэх хэрэгтэй” гэлээ