Майкрософт корпорацийг үүсгэн байгуулагч, дэлхийн гурав дахь баян хүн Билл Гэйтс саяхан Блүүмбэрг сувагт ярилцлага өгөхдөө биткоины хөрөнгө оруулалтын талаар хүмүүст зөвлөжээ.

“Илон Маск бол маш их мөнгөтэй, маш их мэдлэгтэй хүн тул түүний биткоин өсөх, буурахад миний санаа зовохгүй байна. Харин мөнгө багатай хүмүүс биткоинд хөрөнгө оруулах нь маш их эрсдэлтэй. Хэрвээ Илон шиг баян л биш бол үүгээр оролдохгүй байх нь дээр гэж би зөвлөх байна” гэж тэр ярьсан байна.

Илон Маскын үүсгэн байгуулсан Тесла компани $1.5 тэрбумаар биткоин худалдаж авсан нь саяхан ил болсон юм. Энэ мэдээллийг тарсны дараа биткоины ханш огцом нэмэгдэж, $58,000 давсан бол сүүлийн хэдэн өдөр 13 орчим хувиар унаж, $46,000 гаруйд хүрээд байна.

Байгаль орчныг хамгаалах үйлсийн идэвхтэн Билл Гэйтс өмнө нь биткоины олборлолт, гүйлгээ асар их эрчим хүч хэрэглэдэг тул дэмждэггүйгээ илэрхийлж байв. Мөн нэр усгүй гүйлгээ хийх боломж нь сайн зүйл биш гэж бодож явдгаа тэр хэлж байжээ.

“Дижитал мөнгө бол хэрэгтэй зүйл. Манай сан энэ чиглэлд их зүйл хийдэг. Гэхдээ дижитал мөнгөний гүйлгээг хэн гүйцэтгэсэн нь мэдэгдэхгүй, нууцлаг байх нь яавч сайн юм биш” гэж Гэйтс ярьж байв.

Билл Гэйтсээс гадна АНУ-ын сангийн сайдаар өнгөрсөн сард томилогдсон Жанет Йеллен байгаль орчинд сөрөг нөлөө үзүүлдэг криптовалютын ирээдүйд эргэлздэгээ саяхан хэлсэн юм.

“Биткоиныг гүйлгээний үндсэн механизм болно гэдэгт би итгэдэггүй. Төлбөр тооцоо хийхэд ийм их эрчим хүч хэрэглэх нь ямар ч үр ашиггүй зүйл юм” гэж тэр Даваа гарагт Нью Йорк Таймс сонинд ярьжээ.

Эх сурвалж: Business Insider