“Геосан” ХХК Аэродромын үйл ажиллагаа эрхлэх гэрчилгээгээ Иргэний нисэхийн ерөнхий газар (ИНЕГ)-ын даргаас хүлээн авлаа.

ИНЕГ-аас “Таван толгой” нисэх буудалд ИНД-139-ийн хүрээнд хяналт, шалгалтыг зохион байгуулж, хяналт шалгалтын үр дүнд үндэслэн Хязгаарлагдмал аэродромын гэрчилгээг 2026 оны 11 дүгээр сарын 3-ны өдөр ИНЕГ-ын дарга Г.Батбаяр гардууллаа.

Тус компани нь ИНД-139 “Аэродромын үйл ажиллагаа, гэрчилгээжүүлэлт”-ийн дагуу Өмнөговь аймгийн Цогтцэций сумын нутаг дэвсгэрт байрлах “Таван толгой” нисэх буудлын аэродромын гэрчилгээ эзэмшигч боллоо. Агаарын тээвэрлэгч байгууллага аэродромын үйл ажиллагаа эрхлэгч болж байгаа нь Монгол Улсын иргэний нисэхийн салбарт анхны тохиолдол юм.

ИНЕГ-ын дарга Г.Батбаяр агаарын тээвэрлэгчийн гэрчилгээ эзэмшигч байгууллага үйл ажиллагааныхаа хүрээг тэлж, иргэний нисэхийн олон талт үйл ажиллагаа эрхэлж байгааг онцоллоо.

“Геосан” ХХК нь ИНД-119 “Агаарын тээвэрлэгчийн гэрчилгээжүүлэлт”, ИНД-125 “Дунд нисэх онгоцны арилжааны нислэгийн үйл ажиллагаа”-ны хүрээнд тус тус үйл ажиллагаа явуулдаг билээ.