Ковид цар тахалтай холбоотойгоор хөл хорио тогтоох, аж ахуйн нэгжийн үйл ажиллагааг хэсэгчлэн болон бүр зогсоох зэрэг арга хэмжээтэй холбоотойгоор хэрэглээний бараа бүтээгдэхүүний үнэ өссөөр байгаа. Энэ нь иргэдийн худалдан авалтад шууд нөлөөлдөг. Тэгвэл хэрэглээний бараа, үйлчилгээний үнэ 2021 оны 3 дугаар сард улсын хэмжээнд өмнөх оны мөн үеэс 2.5 хувь,  өмнөх оны эцсээс 3.1 хувь,  өмнөх сараас 0.6 хувиар өссөн байна.

Үнийн өсөлтөд хүнсний бараа, ундаа, ус, согтууруулах ундаа, тамхи, орон сууц, ус, цахилгаан, түлш, эм тариа, эмнэлгийн үйлчилгээний үнэ голлон нөлөөлжээ.

Хэрэглээний бараа, үйлчилгээний сагсанд нийт 373 нэр төрөл тэр дундаа Улаанбаатар хотын хэмжээнд 344 нэр төрлийн бараа бүтээгдэхүүн, үйлчилгээний үнийг судалдаг.  Нийт 373 нэр төрлийн бараа бүтээгдэхүүний 200 нь импортын бараа, бүтээгдэхүүн байгаа бөгөөд энэ нь нийт жингийн 45.5 хувийг эзэлдэг. Өөрөөр хэлбэл, хэрэглээний бараа бүтээгдэхүүний үнийн өсөлт инпортын бараа буурсантай ч холбоотой байж болох. Манай улсын экспорт импорт энэ оны 2 дугаар сараас огцом буурсан бөгөөд үүнтэй холбоотойгоор цаашид ч хэрэглээний барааны үнэ өсөх магадлалтай юм.

Нийслэлд мах, гурил, ногооны үнэ өссөн бөгөөд долоо хоног бүр харилцан адилгүй байдаг. Тухайлбал, хонины ястай мах нэг килограмм нь дунджаар 12468 төгрөг, үхрийн ястай мах нэг килограмм нь дунджаар 13862 төгрөгийн үнэ ханштай байна. Үхрийн ястай мах “Хархорин” хүнсний захад хамгийн хямд буюу 12800 төгрөг, харин “E-март” худалдааны төвд хамгийн өндөр үнэтэй буюу 15800 төгрөгийн үнэтэй байгаа юм. Харин гурил 1-р зэргийнх нь 1300 төгрөгөөс дээш үнэтэй байна. Хүнсний ногооноос хамгийн их өссөн нь монгол байцай 5.1 хувиар өсч 2130 төгрөгөөр, монгол хүрэн манжин 3.7 хувиар өсч 2667 төгрөгөөр, сонгино 7.1 хувиар өсч 2011 төгрөгөөр худалдаалж байна.