“Хас энтертаймент”-ийн захирал, Найруулагч, МУСТА Ц.Хүсэлбаатартай шинэ уран бүтээлийнх нь тухай ярилцсанаа эрхэм уншигч та бүхэндээ хүргэж байна.

- Та их завгүй байгаа бололтой. Цаг хугацааг алтнаас ч илүү үнэтэй гэдэг. Тийм үнэтэй зүйлээсээ хуваалцаж байгаад баярлалаа. Өнөөдөр ямар ажилтай явна вэ?

Ц.Хүсэлбаатар: Өөрөө ч бас надад цаг гаргаж ярилцаж байгаад баярлалаа. Өнөөдрийн хувьд “Аюултай харилцаа” уран сайхны киноны гадаа зураг авалттай явж байна.

- “Аюултай харилцаа” гэхээр их л ноцтой өгүүлэмжтэй кино байх юм шиг сэтгэгдэл төрж байна л даа. Жишээлбэл, эротик маягийн ч юм уу?

   Ц.Хүсэлбаатар: “Аюултай харилцаа” уран сайхны киноны гол агуулга нь хүн нэгэнт гэр бүл зохиосон бол үнэнч байх шаардлагатайг харуулахыг зорьж байгаа. Гэр бүлээс гадуурх харилцааг зугаа цэнгэл мэт хөнгөн хүлээн авдаг хүмүүс байдаг. Хэрэв чи хэн нэгний зүрх сэтгэлээр наадаад өнгөрчихнө гэж бодсон бол тэр нь өөрөө асар том алдаа байж болох юм шүү. Зугаа цэнгэл гэж бодсон нэг удаагийн алдааны хариуд өөрийнх нь амьдралд нөхөж баршгүй гарз хохирол ч тохиолдож болно. “Олон хавар нэгэндээ” гэдэг үг байдаг даа. Өөрөөр хэлбэл “Түүгээр явсан гайг үүгээр бүү дууд” гэдэг үг манай киноны агуулга санаатай нэгдэж байгаа юм.

- Нийгэмд аюултай харилцаа элбэг байгааг бид харж, сонсож л байна. Тэр харилцаа илчлэгдсэнээр гэр бүл салалт, өнчрөл, өшөө авалт гээд бараан сүүдрийг дагуулсаар л байна. 

 Ц.Хүсэлбаатар: Нэгэнт л зовлон жаргалаа хамтдаа хуваалцана гэж гэр бүл зохиосон хүмүүс нэгнээ алдаж оносон үед нь уучлах шиг ончтой гарц ховор байдаг бололтой. Гэхдээ би энэ үгээрээ нэг нь алдаад, нөгөөх нь уучлаад бай гэсэн санааг хэлэх гэсэнгүй шүү. Харин тэр алдааг уучилж чадвал ямар их гай зовлонгоос гэр бүлээ гэтэлгэн, аварч болохыг хүмүүс тухайн үеийн сэтгэл хөдлөлдөө автаад анзаардаггүй. Тэгэхээр кино маань нийгэмд сургамжтай мессежийг хүргэнэ.

- Энэ бол амьдрал дээр их байгаа хүнд үзэгдэл.  Хүнд сэдвийг хөнгөн, сонирхолтойгоор үзэгчдэд хүргэнэ гэдэг найруулагчийг их “Ухна” биз.  

Ц.Хүсэлбаатар: Бидний бүтээж байгаа “Аюултай харилцаа” киноны жанр нь олон улсын нэр томъёогоор бол мистик, триллир. Өөрөөр хэлбэл түгшүүрт кино. Гэхдээ энэ бол айдсын кино биш. Үзэгчдэд сургамжтай, сонирхолтой мэргэжлийн түвшний уран бүтээл хүргэх гэж өөрөө өөрийгөө дайчилж байна.

- Найруулагч жүжигчнээ хэн гэдгийг нь мэдэхгүй бол жүжигчин өөрийгөө хэн болохоо ойлгодоггүй гэдэг үг байдаг?  Та сонгосон жүжигчдээ танилцуулаач?

Ц.Хүсэлбаатар:  Манай киноны гол дүр болох Туулын дүрд УДЭТ-ын жүжигчин, СТА Г.Отгонцэцэг тоглож байна. Туул бол сэтгэлийн маш олон өнгийг гаргах дүр. Хөгжмөөр ярьвал долоон нотыг дуугаргаж чадах жүжигчин надад хэрэгтэй байсан. Тэр бол яалт ч үгүй Г.Отгонцэцэг мөн. Отгоо зохиолтой танилцаад “Энэ бол жүжигчин хүний чадварыг шавхах дүр мөн учраас би ажиллая” гэсэн.

Харин Мөнх бол эрэгтэй гол дүр. Мөнх өөрөө өөрийгөө бусдын амьдралд тус хүргэдэг хуулийн хүн гэж ихэд тоож явсан. Гэтэл хувийн амьдралдаа алдаж, асуудлыг шийдэж чадахгүйд хүрдэг. Энэ дүрд харагдах байдлаасаа нүдэнд дулаахан, гэмгүй цайлган, бас хүчирхэг байж чадах эрэгтэй жүжигчнийг олох хэрэгтэй байсан. Найруулагчийн хувьд маш олон залуусыг бодсон. Амараа, Эрдэнэбилэг, Болд-Эрдэнэ, Гэрэлсүх гээд урдаа барьдаг мундаг залуу жүжигчид толгойд орж ирсэн. Гэхдээ Мөнхийн дүрд А-Саppella хамтлагийн дуучин, жүжигчин Э.Мөнхтөрийг бид олж авсан. Энэ дүрийг гаргаж чадах уран бүтээлч мөн гэдгээ киноны  сургуулилт, эхний зураг авалтууд дээр батлан харуулсан.

Мөнхийн гэргий Цэлмэгт миний охин Х.Баярмаа тоглож байгаа. Би Баярмааг миний охин гэдэг утгаараа дүр өгсөн хэрэг биш. Харин энэ хүнийг дотор нь орсон юм шиг мэдэхийнхээ хувьд Цэлмэгийн дүрд сонгосон. Харахад уян зөөлөн хэрнээ амьдралаа аврах эцсийн шийдвэрийг муухан эр хүнээс илүү гаргаж чадах эр зоригийг тэр харуулж чадах хүн гэж би итгэж байна. Миний итгэлийг биелүүлэх байх гэж бодож байгаа.

Мөнхийн найз Тэнгисийг гаднаас нь харвал их хөнгөмсөг, зугаа цэнгэлд дуртай нэгэн. Амьдрал дээр яг түүн шиг харагддаг хэрнээ чухал асуудалд эргэлзэлгүй шийдвэр гаргаж чаддаг, хүн чанар сайтай хүмүүс бишгүй байдаг. Энэ дүрд туршлагатай залуу жүжигчин  СТА С.Ариунбямба ажиллаж байна. Харин Эсгил хэмээх гал цогтой бүсгүйн дүрд авьяаслаг залуу жүжигчин П.Шүүдэрцэцэг сонгогдсон. Ийм авьяаслаг, чадварлаг залуусаар баг бүрдүүлэн ажиллаж байна. Тийм учраас зургаар бол сайхан уран зураг болно гэж найдаж байна.

- Кино бол дүрсний урлаг. Тийм ч учраас найруулагчийн баруун гар бол зураглаач байдаг болов уу.

Ц.Хүсэлбаатар: Яг үнэн. Уран бүтээл гэдэг бол хамтын ажлын үр дүн. Кино хэдий  найруулагчаараа овоглогддог ч үүний цаана зураглаач, инженер техник, нүүр хувиргалт, арын алба, маркетингийн алба гээд өч төчнөөн хүн ажилладаг. Кинонд оролцож байгаа бүх хүнээ дурьдмаар байвч уншигчдыг тань залхаахаас айж байна. Товчхондоо “Аюултай харилцаа” уран сайхны кинонд чадварлаг шилмэл уран бүтээлчдийн баг ажиллаж байгаа. Жишээ нь манай киноны Ерөнхий зураглаачаар Н.Баттуяа ажиллаж байна. Бид урьд нь “Сүүлчийн бүжиг” уран сайхны кинон дээр хамтарч ажиллаж байсан. Гар нийлдэг уран бүтээлчид гэж ойлгож болно. Харин Ерөнхий зураачаар сүүлд “Миний ах атаман” кинонд ажилласан С.Пүрэвхүү, Ц.Мягмарцогт нар ажиллаж байна. С.Пүрэвхүү бол маш чамбай, зохион байгуулалт сайтай уран бүтээлч. Мөн кастинг найруулагчаар СТА, Ц.Төмөрхуяг ажиллаж байгаа. Ажлаа мэддэг, итгэл даах уран бүтээлчид нэгэн зорилго дор зангидагдаж  байгаа болохоор сэтгэл их өндөр, өөдрөг байна.  

- Энэ бол таны анхны, эхний уран бүтээлүүд биш. Тийм болохоор найруулагч өөрөө өөртөө тавих шаардлага өндөр байна уу?

Ц.Хүсэлбаатар:  Би 20-иод жил шоу урлагийн салбарт хүчин зүтгэж байгаа хүний хувьд энэ тогооноос амттай сайхан, хатуу ширүүн бүхнийг нь амсаж яваа. Монголд киноны зах зээл тун жижиг. Хумигдмал энэ зах зээл дээр гарч ирж байгаа олон уран бүтээлүүд хоорондоо чанараараа өрсөлдөхгүй л бол нэг хэвийн байх арга байхгүй. Монголын урлагийн зах зээлд “чанар” гэсэн  хууль ширүүн үйлчилж байна. Тийм ч учраас одоо надад муу юм хийх эрх байхгүй. Уран бүтээл дээр алдаж явсан удаа надад бий. Тааруу бүтээл хийхээр яадаг гэдгийг яс махаараа мэдэрсэн. Дахиж тэр гашуун зовлонг мэдэрмээргүй байна. Дахиж алдах цаг хугацаа, эрх надад алга. Муу бүтээл хийхгүйн тулд чармайж, зүтгэж байна. 

- Киноныхоо зохиолыг таныг өөрөө бичсэн гэж сонссон.

Ц.Хүсэлбаатар: “Аюултай харилцаа” уран сайхны киног сайн бүтээл болгохын тулд зохиолтойгоо л гэхэд жил тойрон зууралдлаа. Зохиолоо аль болох олон хүнд уншуулж санаа оноо, шүүмжийг сонссон.  Нэмэхийг нь нэмж, хасахыг нь хасаж усыг нь шавхсаар сайн болсон гэдэгт нүүр бардам байна. Энэ сайн зохиолын чансааг нь бүтээлээрээ харуулах нь чухал. Дорнын их хүмүүн В.Инжинаш гуайн хэлсэн “Хүмүүний сэтгэлийг хөвсөлзүүлж эс чадваас хөнгөн бийрийг хөших хэрэг юун” гэдэг үг байдаг. Бидний дүрс, жүжигчний ур чадвараар дамжуулан илэрхийлж байгаа санаа маань үзэгч хүмүүний сэтгэлд хүрэхгүй байх аваас бидний мэргэжил гомдоно. Хүний сэтгэлийн өнгийн толь руу өнгийн харна гэдэг бол их хэцүү ажил л даа. Гэхдээ бидний ажил мэргэжил ийм. Хүний дотоод сэтгэлийн чанад руу харах оролдлогыг бид хийж байна.

- Найруулагч Ц.Хүсэлбаатарын хэлэх дуртай үг юу вэ?

Ц.Хүсэлбаатар:  Хэцүү цагт өөртөө хэлдэг, ойр дотны хүмүүс маань бухимдаж байгаа үед “Бүх юм сайхан болноо” гэж хэлдэг. Энгийн мэт энэ үг тайвшрал, итгэл үнэмшил сайн сайхныг дууддаг гэж боддог. Хүмүүсийн амьдралд гашуун зовлон, санхүүгийн бэрхшээл юу ч тохиолдож болно. Энэ бүгдийн дараагаар бүх зүйл сайхан болно гэдэгт итгэж явах хэрэгтэй. Тэнгэр дандаа бүрхэг байдаггүй шүү дээ.

- Таны шинэ кинонд амжилт хүсье. Цаг гарган ярилцсанд баярлалаа.

Ц.Хүсэлбаатар: Баярлалаа. Танай сайтын хамт олонд ч гэсэн ажлын өндөр амжилт хүсье.