2021.09.15. МУИС болон “Андореан” ХХК дэлхий нийтээр аж үйлдвэр, технологийн шинэ эрин үед шилжиж буй энэ үед Монгол хүний оюуны үнэлэмжийг нэмэгдүүлэх, олон улсын түвшинд хүргэсэн судалгаа хөгжүүлэлтийг хийх, өндөр мэдлэг чадвар бүхий мэргэжлийн боловсон хүчнийг бэлтгэх, орчин үеийн дэвшилтэт технологид суурилсан шинэ технологийг боловсруулах, гарааны компанийн үйл ажиллагааг дэмжих хүрээнд хамтран ажиллах санамж бичиг байгууллаа.

Талууд хамтын ажиллагааны хүрээнд хамтарсан болон захиалгат эрдэм шинжилгээ, судалгаа боловсруулалтын ажил гүйцэтгэх, судалгаа шинжилгээний ажил, төсөл хөтөлбөрийг хэрэгжүүлэх, шинэ технологи, инновацийн хамтын ажиллагаа, түншлэлийг өргөжүүлэх, МУИС-ийн дэргэд байгуулагдаж буй өндөр технологийн гарааны компаниудыг дэмжихэд хамтран ажиллана.

Уулзалтад МУИС-ийн Эрдэм шинжилгээ, хамтын ажиллагаа хариуцсан дэд захирал Н.Батхүү, Хамтын ажиллагааны хэлтсийн мэргэжилтэн Б.Ганбат, Инноваци, технологи дамжуулах төвийн ахлах мэргэжилтэн Д.Лхагвасүрэн, “Гарааны Дижитал Солюшнс” ХХК-ийн үүсгэн байгуулагч профессор А.Энхбаяр, “Андореан” ХХК-ийн гүйцэтгэх захирал Ч.Анар, Үйл ажиллагаа хариуцсан захирал Ч.Эрдэнэтуяа нар оролцлоо.

Энэхүү уулзалтыг МУИС-ийн Эрдэм шинжилгээ, хамтын ажиллагаа хариуцсан дэд захирал Н.Батхүү нээж хэлсэн үгэндээ: МУИС-ийг хөгжүүлэх стратеги төлөвлөгөөнд их сургууль, аж үйлдвэрийн хамтын ажиллагааг хөгжүүлэх, мэдлэгт суурилсан инновацийг үйлдвэрлэлд нэвтрүүлэх, ахисан түвшний судалгаа, сургалтыг дэмжихэд ихээхэн анхаарч байна. Өнөөдөр бидний эхлүүлж байгаа хамтын ажиллагааны санамж бичигт тусгагдсан ажлуудыг жил бүр дүгнэж, хамтран үр бүтээлтэй ажиллахад манай сургуулийн зүгээс шаардлагатай дэмжлэг үзүүлэх болно. Их сургуулийн дэргэд байгуулагдсан гарааны компаниуд дотор симуляц, тооцоолол, өндөр технологийн салбарт Дижитал солюшнс компани амжилттай ажиллаж байгаа ба танай компанитай хамтарч олон бүтээлч ажлууд хийнэ гэдэгт итгэж байна гээд хамтын ажиллагаанд амжилт хүслээ.

“Андореан” ХХК-ийн гүйцэтгэх захирал Ч.Анар хэлсэн үгэндээ: 1998 онд анх элсэж орсон сургуультайгаа өнөөдөр албан ёсоор хамтын ажиллагаа эхлүүлж байгаадаа баяртай байна. Өдгөө манай компани нь дотоод, гадаадын зах зээлд нийт 16 салбар компани, 400 гаруй ажилтантай үйл ажиллагаа явуулж байна. Гол зорилго нь Монгол залуус, тэдний оюуны чадварыг дэлхийн түвшинд үнэлүүлэх, цаашид дижитал эрин үеийн цахим шилжилтэд оюутан залуусыг өндөр чадвартай боловсон хүчин болгон бэлдэхэд өөрсдийн хувь нэмрээ оруулах, дэмжиж ажиллах юм. Дэлхий нийтийн жишгээр их сургуулиас олон инновац шинэ санаа төрөн гарч, гарааны компаниар дамжуулан нийгэмд баялаг бүтээдэг. Энэ утгаараа бид МУИС-ийн дэргэд байгуулагдсан Дижитал солюшнс ХХК-д хөрөнгө оруулж хамтран ажиллах ба цаашид шилдэг төгсөгчдөд тэтгэлэг олгох, шинжлэх ухааны судалгааны төвүүдийг дэмжиж ажиллах болно гэв.

ИННОВАЦИ, ТЕХНОЛОГИ ДАМЖУУЛАХ ТӨВ