Сурагчдын хичээлийн хоцрогдол арилгах төлөвлөгөө, судалгаа, бэлтгэл ажилтай холбоотой асуудлаар БШУЯ-аас мэдээлэл өгч байна.

Мэдээллийн эхэнд сайд Л.Энх-Амгалан “Та бүхэн есдүгээр сарын 1-ний өдөр хичээл сургуулийг яаж явуулсныг санаж байгаа байх. Эрдэмтдийн судалгаа, тооцоо судалгаа зэрэгт үндэслэн хоёр жил гаруйн хугацаанд хаалттай байсан сургуулиа нээхээс өөр аргагүй болсон. Үүний гол нөлөөлсөн хүчин зүйл нь дархлаажуулалт байсан юм. Багш, сурагчдаа нэлээд сайн дархлаажуулсан. Хоёрдугаарт, хүүхдүүд дунд халдварын тархалт бага байсантай холбоотой.

Ингэхдээ хичээлийг 5/9 зарчмаар эхлүүлсэн. Энэ стратеги зөв байсан нь батлагдсан.

Тухайлбал, хичээлийг 100 хувь танхимаар явуулсан 469 сургууль, хосолсон хэлбэрээр 365 сургууль, цахимаар 8 сургууль хичээллэсэн. Хосолсон хэлбэрээр хичээллүүлэхэд халдвар голомтолж тархаагүй сайн үр дүн гарсан. Цаашид сургууль, цэцэрлэгийг аль болох танхимаар хичээллүүлэх талаар саналыг НҮБ-аас Засгийн газарт хүргүүлсэн.

Өнгөрсөн хугацаанд цэцэрлэгийн хүүхдийг зодсон, сурагч дотуур байрандаа амь насаа алдсан зэрэг олон асуудал гарсан. Мөн хүүхдийн ганцаардах зэрэг явдал байгаа учраас сэтгэл зүйч ажиллуулахаар болсон. Ингэснээр сурагч сургуулийн орчинд аюулгүй сурч боловсрох боломж бүрдэх юм.

Хүүхэд авах ёстой мэдлэгийнхээ 60-70 хувийг танхимаар авдаг. Гэтэл өнгөрсөн хугацаанд эсрэгээрээ байсан учраас авах ёстой мэдлэгээ авч чадаагүй. Гол асуудал нь хичээлийн хоцрогдлыг нөхөх юм. Үүнийг ерөнхий ярьж болохгүй. Ковид-ын өмнөх болон ковид-ын дараах гэж ангилах ёстой. Эцэг эхчүүдийн 48 хувь нь хичээлийг 100 хувь танхимаар явуулж байж хоцрогдлыг арилгаж чадна гэж үзсэн. Судалгаагаар 40 наснаас доош насны хүмүүс хүүхдүүдтэйгээ сайн ажилласан гэсэн үр дүн гарсан. Цаашид бүх сургалтыг танхимаар 100 хувь сургахад анхаарч ажиллах ёстой.

Өнгөрсөн хоёр жилийн хугацаанд 2000 гаруй хүүхэд сургууль завсарлах эрсдэл нүүрлэсэн байна. Энэ нь өнгөрсөн хоёр жилээс өмнөх хугацаатай харьцуулахад 60 орчим хувиар өссөн нь хамгийн том аюулыг бий болгож байна. Үүнээс гадна хоёр хүүхдийн нэг нь тоо бодох чадвартай, 10 хүүхэд тутмын зургаа нь унших чадвартай байна гэсэн сэтгэл эмзэглүүлэм үр дүн гарч байна. Ялангуяа, хоёр, гуравдугаар ангийн хүүхдүүд багш, ангийн хүүхдүүдээ мэдэхгүй, уншиж байгаа мөртлөө юу уншиж байгаагаа мэдэхгүй, тоо бодож байгаа хэрнээ аргаа ойлгоогүй буюу мэдлэг чадварынхаа 50 хувийг л эзэмшсэн үлдсэн нь хоцрогдолд орсон байна.

"Сургуульдаа очиж ангидаа сууж үзээгүй, багштайгаа, ангийнхантайгаа уулзаж үзээгүй бүхэл бүтэн үе бий болсон байна.

Судалгаагаар сурагчид монгол хэл, түүх, хүн ба байгаль, физик, математик англи хэлний хоцрогдол өндөр байна гэж гарсан гэв.