“Хөдөлмөрийн аюулгүй байдал, эрүүл ахуйн аян” эхэллээ.

Манай улс жил бүрийн дөрөвдүгээр сард тус аянг тэмдэглэн өнгөрүүлдэг. Ажилтныг ажлын байран дахь осол, мэргэжлээс шалтгаалсан өвчлөл болон бусад эрсдэлт хүчин зүйлийн нөлөөллөөс хамгаалах, урьдчилан сэргийлэх, хөдөлмөрийн аюулгүй байдал, эрүүл мэндийн эерэг соёлыг түгээх нь сарын аяны зорилго аж.

Аянг нээж Хөдөлмөр нийгмийн хамгааллын сайд А.Ариунзаяа “Аж ахуй нэгж, байгууллагууд ажилтны эрүүл мэндийг хамгаалах, ажил мэргэжлээс шалтгаалсан өвчлөлөөс урьдчилан сэргийлж Хөдөлмөрийн аюулгүй байдал, эрүүл ахуйн тухай хууль болон бусад хууль тогтоомж стандартыг хэрэгжүүлж байгаа ч үйлдвэрлэлийн ослын тохиолдлууд буурахгүй байна. Ослын улмаас хөдөлмөрийн чадвараа алдах, амь нас эрсдэх тохиолдол нэмэгдсээр байгаа нь аюулын харанга дэлдэж байна. 2021 онд 256 хүн үйлдвэрлэлийн осолд өртсөнөөс 34 хүн нас барсан. Нар барсан иргэдийн 33 нь буюу 99 хувь эрчүүд байгаа юм. Нас баралт, дундаж наслалтын зөрүүтэй байдал нь хөдөлмөрийн аюулгүй байдалтай шууд хамааралтай. Тиймээс хөдөлмөрийн аюулгүй байдал, эрүүл ахуйг маш сайн анхаарч, аюулгүй байдлын соёлыг төлөвшүүлэхэд хамтран ажиллацгаая” гэлээ.

Статистик үзвэл, сүүлийн таван жилд ажлын байран дээрээ 1560 хүн осолдсоноос 760 хүн нь хүнд гэмтэж, 183 хүн нас барсан байна. Ослын шалтгаан нь ихэвчлэн унаж бэртэх, халтирах, эд зүйлд хавчуулагдах, цохигдох, түлэгдэх, цахилгаанд зохиулах зэрэг байдаг аж.

Хөдөлмөр, нийгмийн хамгааллын дэд сайд С.Зулпхар “Та бүхэнд нэг жишээ хэлье. Багш нар шохой хэрэглэхэд амьсгалын замын өвчлөлд өртөмхий болдог. Тиймээс шохойноос татгалзаж, сүүлийн үед палмастер хэрэглэж байгаа нь хөдөлмөрийн аюулгүй байдлыг хангаж буй хэрэг юм. Энэ мэт хөдөлмөрийн аюулгүй байдал, эрүүл ахуйн чиглэлээр зөв соёлыг төлөвшүүлэх хэрэгтэй. Соёл төлөвшихөд цаг хугацаа хэрэгтэй. Бүгдээрээ соёлыг дэлгэрүүлж, ажлынхаа дадалтай уялдуулан ажиллацгаая” гэсэн юм.

Хөдөлмөрийн аюулгүй байдал гэдэг нь хөдөлмөрлөх үйл явцад хүний эрүүл мэнд, хөдөлмөрлөх чадварт үйлдвэрлэлийн аюултай, хортой хүчин зүйлийн нөлөөллийн түвшин нь эрүүл ахуйн зөвшөөрөгдсөн хэмжээнээс хэтрээгүй байхыг хэлнэ. Харин хөдөлмөрийн эрүүл ахуй гэдэг нь хөдөлмөрлөх явцад хими, физик, биологийн хүчин зүйлээс шалтгаалан бие махбод, мэдрэл сэтгэхүйд өөрчлөлт орж өвчлөх, хөдөлмөрийн чадвараа түр болон бүрэн алдахаас урьдчилан сэргийлэхэ чиглэсэн үйл ажиллагааг хэлдэг байна.

Ажлын байрны гэмтэл, осол уул уурхай, тээврийн салбарт ихээхэн гардаг аж. Гэвч суугаа ажилтай, оффисын ажилчдад ч мөн эрүүл мэндээрээ хохирох тохиолдол гардаг байна. Тухайлбал, ажлын байранд агааржуулалт муутай байснаас болж эмэгтэйчүүд хүүхэд тээхэд хүндрэлтэй болдог байна. Мөн удаан хугацаагаар сууж ажилласнаас болж нуруу, толгой өвдөх, удаан дэлгэц ширтсэнээс болж нүдний хараа муудах нь хөдөлмөрийн аюулгүй байдал алдагдсанаас болдог гэдгийг илтгэгчид онцолж байлаа.

_{Ажлын байран дээрх осол гэмтэл, хөдөлмөрийн аюулгүй байдал алдагдсанаас үүссэн өвчлөлийг эмчилдэг Мэргэжлийн өвчин судлалын эмнэлгийг өргөжүүлэхээр болжээ.}

Энэ талаар ХНХЯ-ны харьяа Хөдөлмөрийн аюулгүй байдал эрүүл мэндийн төвийн дарга М.Даваабат “Манай төвөөс Монгол Улсын хэмжээнд Мэргэжлийн өвчин судлалын эмнэлгийн үйл ажиллагааг өргөжүүлэх зорилтыг дэвшүүлэн ажиллаж байна. Манай улсад ажил мэргэжлээс шалтгаалах өвчин нэмэгдэж байгааг анхаарах шаардлагатай болсон. Тиймээс Монгол Улсын Засгийн газрын 2020-2024 оны үйл ажиллагааны хөтөлбөрт Мэргэжлийн өвчин судлалын эмнэлгийн барилга, оношилгоо, үзлэгийг сайжруулахаар оруулж өгсөн. Үүнд холбогдох байгууллагууд хамтран ажилласны хүчинд улсын хөрөнгө оруулалтаар шинэ эмнэлэг барих санхүүжилтийг шийдвэрлэсэн. Эмнэлгийг есөн давхар, 50-60 ортой байхаар төлөвлөж байна” гэлээ.

Мэргэжлийн өвчин судлалын эмнэлэг нь 55 жилийн түүхтэй. Тус эмнэлэг нь мэргэжлээс шалтгаалсан өвчнийг оношлох, эрт илрүүлэх, эмчлэх, нөхөн сэргээх, сувилах, хөдөлмөр зохицуулалтын, магадлах чиг үүрэгтэй ажилладаг байна.

“Хөдөлмөрийн аюулгүй байдал, эрүүл ахуйн аян” нэг сарын хугацаанд үргэлжилнэ. Аянд Хөдөлмөр, нийгмийн хамгааллын яам, Хөдөлмөрийн аюулгүй байдал, эрүүл мэндийн төв, Мэргэжлийн хяналтын Ерөнхий газар, Нийгмийн даатгалын Ерөнхий газар, яамдын ХАБЭА-н салбар хороо, Нийслэлийн есөн дүүргийн ХАБЭА-н зөвлөл, Хөдөлмөр, халамжийн үйлчилгээний газар хэлтэс, ХАБЭА-н чиглэлээр үйл ажиллагаа явуулдаг сургалтын байгууллага болон хувийн хэвшлийн аж ахуйн нэгж байгууллагын төлөөллүүд оролцож байна.