И.К.Азизовын авир арай л хэтэрч байна!

ОХУ-аас Монгол Улсад суугаа онц бөгөөд бүрэн эрхт элчин сайд И.К.Азизов нийгэмд сүүлийн жил орчим маш их хэл ам дагуулах болсон билээ. Түүний бодлоггүй үйлдэл, Монгол Улсын дотоод хэрэгт хөндлөнгөөс оролцсон байж боломгүй авир нь 3-р сарын 24-нд Монгол Улс дахь ОХУ-ын Элчин сайдын Яамны албан ёсны сошиал хуудсанд "Монголын Ардчилсан Намын гишүүд болон АНУ-ын либерал ноёрхлыг дэмжигчдийн анхааралд" гэсэн тайлбартай пост нийтлэгдсэн явдлаар илэрч, энэ нь иргэдийн бухимдлыг ихэд төрүүлж байв.

Улмаар ОХУ-аас Монгол Улсад суугаа Онц бөгөөд Бүрэн эрхт Элчин сайд И.К.Азизовыг нэн даруй Монгол Улсаас явахыг шаардсан жагсаалыг иргэд удаа дараа зохион байгуулж байлаа.Үүнтэй холбоотойгоор Гадаад Харилцааны Яамнаас түүнтэй холбогдож, энэхүү үйлдэлдээ дүгнэлт хийхийг нөхөрсөгөөр сануулсан байдаг. Гэвч өнгөрсөн долоо хоногт ОХУ-аас Монгол Улсад суугаа Элчин сайдын яамнаас Орос-Монголын хамтарсан сургуулийн захирал Ж.Соронзонг чөлөөлөх Монгол Улсын Засгийн Газрын шийдвэрт дүгнэлт, тайлбар хийсэн мэдэгдэл гаргасан нь арай л хэрээс хэтэрсэн хэрэг болсон юм.

Иймээс ч УИХ-ын гишүүн, Боловсрол, Шинжлэх Ухааны Сайд Л.Энх-Амгалан өчигдөр мэдээлэл хийх үеэрээ энэ тухай: "Орос 3 дугаар сургуультай холбоотой асуудлаар Монгол Улсын Засгийн газар шийдвэрээ гаргасан. Энэ бол ямар ч эргэлт буцалтгүй шийдвэр.

Монгол бол тусгаар улс. Аль ч улсын ЭСЯ, БШУС-ын тушаалыг цаг нь болоогүй гэж үзэн болчимгүй мэдэгдэл гаргах ёсгүй. Энэ бол Монгол Улсын тусгаар тогтнолд халдаж буй үйлдэл.

ГХЯ-ны ноот бичиг гаргана. " гэв.

Мэдээж бид ОХУ-тай ямар нэгэн зөрчил үгүй, найрсаг хөрш. Гэхдээ удаа дараа олон улсын харилцааны дэг ёсыг зөрчиж буй хувь хүн И.К.Азизовт Монголын төр албаны шугамаар ямар нэг шийдтэй гомдол, санал гаргахгүй бол ааш авир нь арай л хэтэрч байгаа юм биш үү?

Элчин сайд бол Зөвлөлтийн үеийн сургагч биш юмсан.

С.Сарнай

Л.Оюун-Эрдэнэ: Түгжрэлийг бууруулахад 2023 оны төсөвт 586 тэрбум төгрөг суулгана
Д.Сарангэрэл: Хөдөлмөр эрхлэлтийг дэмжих бодлогыг илүү боловсронгуй болгоно
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!