Өчигдөр Ерөнхийлөгч Ц.Элбэгдорж Монгол улсын 28 дахь Ерөнхий сайдад нэр дэвшигч Ч.Сайханбилэгийгдэмжиж байгаагаа илэрхийлсэн бичгийг УИХ-ын дарга З.Энхболдод илгээсэн. Үүнтэй холбогдуулан УИХ-ын Төрийн байгуулалтын байнгын хороо бүрэн бүрэлдэхүүнээрээ хуралдаж Ч.Сайханбилэгийг дэмжих эсэхийг шийдвэрлэн чуулганы нэгдсэн хуралдаанд оруулахаар болсон юм. Гэвч тус байнгын хороонд бүртгэлтэй М.Энхболд, Ч.Хүрэлбаатар нарын МАН-ын гишүүд нь хуралдаа хүрэлцэж ирсэнгүй. Ингээд ирц бүрдэхгүйгээс болоод бүтэн цаг гаруй хурал эхлэхгүй хүлээгдэв. Харин хамгийн сүүлд АН-ын Р.Бурмаа гишүүн хуралдаа ирснээр арай ядан ирц бүрджээ. Хуралдааны явцад Н.Батцэрэг, С.Дэмбэрэл нарын зэрэг цөөн хүн Ч.Сайханбилэгээс ганц нэг асуулт асуусан болоод санал хураахад байнгын хорооны хуралд ирсэн 10 гишүүн 100 хувь санал нэгтэйгээр Ч.Сайханбилэгийг дэмжив. Дараа нь УИХ-ын чуулганы нэгдсэн хуралдаан болох байсан боловч энэ өдрийн ажлын цаг нэгэнт дуусчихсан, нөгөөтэйгүүр ирц бүрдэлт эргэлзээтэй тул хойшлуулжээ.
МАН-аас Ч.Сайханбилэгийг дэмжих боломжгүй гэдгээ мэдэгдсэн нь 28 дахь Ерөнхий сайдыг УИХ-ын чуулганы нэгдсэн хуралдаанаар баталж чадах эсэх ихээхэн эргэлзээтэй болгоод байна. МАН-ын Удирдах зөвлөлийн гишүүдийн дийлэнх олонх нь түүнийг Н.Алтанхуягийн Засгийн газрын Хэрэг эрхлэх газрын даргаар ажиллаж байсан хүн бөгөөд эдийн засгаа хямралт байдлаас гаргах оновчтой арга зам сонгож, тууштай ажиллаж чадахгүй гэж үзжээ. Тэгвэл“Шударга ёс” эвслийн бүлгийн гишүүдийн олонхнь Ч.Сайханбилэгийг дэмжихээ илэрхийлсэн ч АН-ын бүлгийн зарим гишүүд эсрэг санаа бодолтой яваа нь найдвар муутай болгож байгаа юм. Нөгөөтэйгүүр, МАН нэгэнт Ч.Сайханбилэгээс татгалзсан болохоор АН-ын бүлгийн зүгээс тус намтай зөвшилцөж чадаагүй хэмээн ойлгож бас болох ажээ. Гэсэн хэдий ч товлосон ёсоор өнөөдөр УИХ-ын чуулганы нэгдсэн хуралдаанаар Ерөнхий сайдад нэр дэвшигчийг хэлэлцэнэ. Хэрвээ Ч.Сайханбилэгийг олонх нь дэмжихгүй бол УИХ-д суудалтай улс төрийн намууд Ерөнхий сайдад хэнийг нэр дэвшүүлэх талаар зөвшилцлийн ширээний ард суухаас өөр замгүй болно. Үндсэн хуулийн 33 дугаар зүйлийн 33.1.2-т “...хэрэв хамгийн олон суудал авсан нам, эвсэл бусад нам, эвсэлтэй зөвшилцөж Ерөнхий сайдад нэр дэвшүүлж чадаагүй бол УИХ-д суудал авсан нам, эвсэл зөвшилцөн олонхиороо нэр дэвшүүлсэн хүнийг Ерөнхий сайдаар томилох саналыг тав хоногийн дотор УИХ-д оруулах...” гэж заажээ.
МАН-ын хувьд Н.Алтанхуягийн Засгийн газрыг л огцруулчихвал бүх юм сайхан болчих мэт аашилсан нь улс төрийн нөхцөл байдлыг улам хүндрүүллээ. Энэ өнцгөөс харвал тус намынхан зөвхөн намынхаа эрх ашгийг урьтал болгож, цаад үр дагавар, үндсэний эрх ашгийг огт бодсонгүй бололтой.
Б.Баяр
tumen.mn
