Өнөө өглөө УИХ-ын чуулганы нэгдсэн худалдаан 51.2 хувийн ирцтэй эхэлжээ. Хуралдаанд харин МАН-ын бүлгийн гишүүд орж ирсэнгүй. Чуулганы танхимд АН-ын болон “Шударга ёс” эвлийнхэн, бие даагчид гэсэн 44 хүн сууж харагдав. Нэгэнт ирц хүрэлцэхүйц тул УИХ-ын дарга хурлаа нээлээ. Энэ үеэр Ерөнхийлөгч Ц.Элбэгдорж эв нэгдлийг илэрхийлчийнхээ хувьд чуулган дээр үгээ хэллээ. Тэрбээр Ч.Сайханбилэгийн талаар танилцуулж, шударга ёсыг бэхжүүлэх, эдийн засгийн хямралт байдлаас ухаалаг арга замаар богино хугацаанд гарахыг онцолсон юм.
АН-аас Ерөнхий сайдад нэр дэвшиж, Ерөнхийлөгч болон УИХ-ын Төрийн байгуулалтын байнгын хорооны дэмжлэгийг авч орж ирсэн Ч.Сайханбилэгээс олон хүн асуулт асуулсан юм. Асуулт асуусан гишүүдийн нэлээд хэсэг нь “Гадаадын хөрөнгө оруулалт тасарсан. Үүнийг яаж шийдэх вэ. Оюу толгой, Таван толгойг хэрхэн үр ашигтай болгох вэ” гэх мэт шийдлээ хүлээсэн эдийн засгийн томоохон хэсэгт анхаарлаа хандуулж байлаа. С.Одонтуяа гишүүн, “2015 оны төсөв бол хямралаас гарах төсөв биш. Үүнд ямар өөрчлөлт хийх вэ” гээд “Төрийн өмчийг хувьчлах тал руу хэтэрхий хазайх нь алдаа болно” хэмээн анхааруулсан юм. Харин Д.Ганхуяг гишүүн, “Ерөнхий сайд нь Засгийн газраа өөрөө бүрдүүлж чаддаг байх нөхцөлийг хангах нь чухал боллоо. Намуудын санхүүжилтийг ил болгохгүйгээр авлигын эсрэг тэмцэх гээд нэмэргүй” гэж байв. М.Зоригт гишүүн, “Засгийн газрын бүтэц бүрэлдэхүүнд мэргэжлийн хүмүүсийг оруулах”-ыг сануулсан бол Д.Арвин гишүүн, “Нам, намын гар хөл болж яваа төрийн дунд шатны ажилтнуудад анхаар. Оюу толгой дээр эмзэг зүйл их бий. Монголынхоо эрх ашгийг бодоорой” гэлээ. Харин Х.Болорчулуун, “Ч.Сайханбилэг та Оюу толгойд олигтой өөрчлөлт хийж чадахгүйг би мэдэж байна. Та түрүүнд ард түмэнд тэр бүр таалагдахгүй шийдвэр гаргах явдал тулгарна гэсэн чинь Оюу толгойг хэлээд байх шиг байна” гэж ёворч, бас егөөдөж байв. Ийнхүү асуулт асууж, үг хэлсэн гишүүдээс нэлээд содон сонсогдсон нь Г.Уянгын үг болов бололтой. Тэрбээр хэлэхдээ “Та бол амьдарлаас тасарсан хүн. Миний саналтай, саналгүй энэ чуулганы хуралдаан таныг дэмжиж Ерөнхий сайд болгох юм шиг байна” гэж байлаа. Ийнхүү хэлэлцсэний эцэст санал хураалтын дүнгээр хуралдаанд оролцсон гишүүдийн 95.5 хувь нь Ч.Сайханбилэгийг дэмжиж Монгол Улсын 28 дахь Ерөнхий сайдаар томилов.
Б.Отгонбаяр
tumen.mn
