Цагаан сарын баярын үеэр замын хөдөлгөөнд хэрхэн оролцох талаар холбогдох албанаас өнөөдөр мэдээлэл өглөө.
ТЦА-ны Урьдчилан сэргийлэх хэлтсийн дарга, дэд хурандаа Б.Очирбат "Энэ цаг үед "Сар шинэ-2023" арга хэмжээг зохион байгуулж байна. Улаанбаатарт 376 уулзвар, 1,700 орчим орц, гарц байдаг. 3,000 орчим орц, гарц, уулзвар дээр алба хаагчийг ажиллуулах зайлшгүй шаардлага гарч байна. Цагдаагийн байгууллагаас уулзвар, гарцад зөвхөн 1/3-д л хүн ажиллуулах нөөцтэй.
Шинийн 1, 2-ны өдөр гэр хороолол, хотын зах руу чиглэсэн хөдөлгөөн их болдог судалгаа бий. Энэ чиглэлд хөдөлгөөнд оролцож буй иргэд дүрмээ баримталж, аль болох эгнээ байраа солихгүй, ШТС, гэр хорооллын гудамжийг сүлжиж хөдөлгөөнд оролцохгүйгээр зорчих шаардлага гарч байна. Замын хөдөлгөөний дүрэм зөрчсөний улмаас нэг гудамжны үзүүрт зам тээврийн осол гардаг. Ингээд бүх гудамж, замд түгжрэл үүсэх хүндрэл учирдаг асуудал байгаа.
Явган зорчигчдын хувьд замын зорчих хэсэг дээр зогсож такси үйлчилгээ авдаг, архи согтууруулах ундааны зүйл хэрэглэчхээд шөнө оройн цагаар гэр бүлийн гишүүд, хүүхдээ дагуулж замын зорчих хэсгээр явдаг. Үүнээс үүдэлтэй нас баралт, гэмтэл нэмэгддэг тул анхаарах хэрэгтэй.
Эцэг эх, асран хамгаалагчид сар шинийн баяраар хүүхдэдээ тавих анхаарал суларсны улмаас хүүхэд зам тээврийн осолд өртдөг. Гэр хороолол, хороолол дотор найз нөхөд, айл, гэр бүлийнхэн цуглачхаад машинаа хөдөлгөхдөө хүүхдийг харахгүйгээр дайрч гэмтээж, амь насанд нь хохирол учруулдаг асуудал байдаг тул анхаарал болгоомжтой байхыг хэлье.
Шинийн 3, 4, 5, 6-нд орон нутаг руу чиглэсэн хөдөлгөөн эрс нэмэгддэг. Иймд нийслэл хотоос гарч байгаа иргэд тээврийн хэрэгслийн хамгаалах бүсийг хэрэглэх, хурдаа тохируулах, шөнийн цагт гэрлээ шилжүүлэх, хэт ядарсан үедээ машин жолоодохгүй байхыг зөвлөе.
Сар шинийн баярын өдрүүдэд цагдаагийн байгууллага нийт аймаг, нутаг дэвсгэрийн бие бүрэлдэхүүнийг хамруулан замын хөдөлгөөний зохицуулалтыг уртасгасан цагаар хийнэ. Цагдаагийн байгууллагаас тавьж байгаа хууль ёсны шаардлагыг биелүүлж, өөрийн болон бусдын аюулгүй байдлыг хангах, зохиомол хэлбэрээр түгжрэл үүсгэх дүрэм зөрчиж явдаг үйлдэл хийхгүй байхыг анхааруулж байна.
Зах худалдааны төвүүдэд дотоодын цэргийн байгууллагын 50 орчим алба хаагч ажиллаж байна. Бямба, Ням гарагт замын цагдаагийн зохицуулагч нар зах худалдааны төв орчимд илүү анхаарал тавьж ажиллаж байгаа. Иргэдийн гол гаргаж байгаа зөрчлийн хувьд зогсоол дээр машинаа давхардуулж тавьдаг. Үүнээс үүдэн зах худалдааны төвүүдийн төв зам дагуух зорчих хэсэгт ачаалал үүсгээд байна" хэмээн ярилаа.
Сар шинийн баярын өдрүүдэд гэр хорооллын орчимд цагдаагийн алба хаагчид түлхүү ажиллах аж.
