Ерөнхий асан Н.Алтанхуяг дөрвөн дугуйтай мотоциклоос унаж эгэмээ гэмтээгээд Солонгос руу яаран ниссэн. Энэхүү адал явдалтай нь бараг зэрэгцээд түүний өнөр гэр бүлийнхний оролцоотой 3 тэрбум төгрөгийн асуудал сөхөгдөж эхлэв.
Хүргэн Дэнзэнгийн хадам Д.Гэрэлхүү нь Н.Алтанхуягийн 50 хувийн эзэмшилд байдаг “Мах экспорт” ХХК-ний Ерөнхий захирал ажээ. “Мах экспорт” нь мах, махан бүтээгдэхүүн үйлдвэрлэх, экспортод нийлүүлэх үйл ажиллагаа эрхэлдэг бөгөөд тус компанидаа Н.Алтанхуяг нь Ерөнхий сайдын алба хашиж байхдаа гурван тэрбум төгрөгийг хаа нэгтэйгээс олгожээ. Энэ мөнгөөр нь Дэнзэн, Д.Гэрэлхүү нар Хэнтий зэрэг аймгуудаас адуу, үхэр худалдан авч нядалж эхэлсэн байна. Одоогоор Хэнтий аймаг дахь компанийнх нь үйлдвэрлэлийн байр гэгчид адууны мах нэлээд их хэмжээгээр хадгалагдаж байгаа аж. Гэвч мал нядалгаа, мах хадгалалтын горим алдагдсанаас түрүүчээсээ экспортын шаардлага хангахгүйд хүрчээ.
Эдгээрээс хүмүүсийн анхаарал татаж буй хамгийн гол зүйл нь гэвэл тэрхүү гурван тэрбум төгрөгийн гарал үүслийн асуудал болоод байна. Иргэний байгууллагууд, авлигын эсрэг “шүгэл үлээгчид” энэхүү гурван тэрбум төгрөгийг Н.Алтанхуяг Засгийн газрын нөөцөөс гаргуулсан байж болзошгүй гээд хууль хяналтын байгууллагад хандахаар болжээ. Түүнчлэн “Мах экспорт”-ын Ерөнхий захирал Д.Гэрэлхүү нь энэ оны 11 дүгээр сарын 4-ний өдөр Мал эмнэлэг ариун цэврийн төв лабораторийн захиргаанд хандан “Хамтран ажиллах тухай” бичиг илгээж лоббидох гэсэн боловч экспортын чанарын шаардлага хангахаа больсон махыг нь тус лабораторийнхан авч хэлэлцэхгүй бололтой.
Дашрамд сонирхуулахад манай хойд, урд хоёр хөрш орон мах авах сонирхолтой байгаа. Гэхдээ эрүүл ахуйн өндөр шаардлага тавьж байна. ОХУ-ын мэргэжилтнүүд саяхан мах бэлтгэлийн 12 үйлдвэрийн үйл ажиллгаатай танилцаад эцэст нь Орхон аймаг дахь “Эрдмийт”, “Преком” гэдэг хоёр компанид мах экспортлох зөвшөөрөл олгожээ. Харин “Мах маркет” болон Дорноговь аймаг дахь “Саян уул” компаниас мах авахаас татгалзав. Учир нь эдгээр үйлдвэрүүд шүлхий гарсан бүс нутагт байрлаж байгаа юм. Хэнтийд ч мөн шүлхий өвчин гарсан. Н.Алтанхуягийнхний “Мах экспорт” нь тэндээс голцуу адууны мах бэлтгэх гэсэн боловч тийнхүү бүтэлгүйтээд байгаа бололтой.
Б.Отгонбаяр
tumen.mn
