Хөгжлийн банкны хэрэгт холбогдсон 83 хүний нэрсийг УИХ-аас зарласан. Улмаар НПГ-аас 2022 оны сүүлчийн өдрүүдээр яллах дүгнэлтийг танилцуулж байв. Хүн тус бүрийнх 1000 давсан хуудастай яллах дүгнэлт болсон учраас цахимаар илгээж танилцуулсан байгаа юм. Гэтэл 83 хүний асуудал яригдаж байсан ч замын дундаас гурав нь сугараад үлдчихжээ. Тодруулбал, 2016-2021 оныг хүртэл Хөгжлийн банкны дэд захирал бөгөөд Хяналт шалгалт, тамгын газрын захирлаар ажилласан
Я.Сод-Эрдэнэ, 2016-2018 онд Хөгжлийн банкны дэд захирал бөгөөд Эрсдэлийн үнэлгээ, удирдлагын газрын захирлаар ажиллаж байсан Г.Дөлгөөн, Хөгжлийн банкны хэлтсийн дарга асан Д.Ринчиндорж нарын хэргийг мөрдөх байгууллага, эсвэл прокурорын аль нэг дээр тусгаарлаад үлдээчихсэн байна. УИХ-ны гишүүн асан Ганбямбын хүү Г.Дөлгөөн, ЕТГ-ын дарга Я.Содбаатарын ах Я.Сод-Эрдэнэ, Б.Ринцэндорж нар нь Төрийн банканд ажиллаж байхдаа тус банкны үйл ажиллагааг доголдуулсан зэрэг үндэслэлээр АТГ-т яллагдагчаар татагдан шалгагдаж байгаа аж. Тиймээс ч эл хэрэгт Хөгжлийн банкны хэргийг нэгтгэн шалгах үндэслэл бүхий шаардлага гарсан учир ийнхүү хэргийг тусгаарласан гэгдэж байгаа юм.
Тэгвэл дээрх нэр бүхий хүмүүсийн хэргийг яагаад ийнхүү тусгаарлах болов гэдэг нь анхаарал татаж буй.
Уг нь АТГ-аас Я.Сод-Эрдэнийг “Бэрэн групп”, “Инжир”, “Баруун баян транс” компаниудын зээлтэй, Г.Дөлгөөнийг “Пирамид орд”, “Монгол мах экспо”, “Монгол эм импекс концерн”, “Инжир”, Ганхүдэр орд”, “Болор шүр”, “Газ импорт”, “Бэрэн”, “Баруун баян транс” зэрэг компаниудын зээлтэй, Д.Ринчиндоржийг “Газ импорт”, “Ганхүдэр орд”, “Инжир”, “Пирамид орд”, “Монгол мах экспо”, “Монгол эм импекс концерн” компаниудын зээлтэй холбогдуулж тус бүр Эрүүгийн хуулийн 22.1.2-т зааснаар эрүүгийн хэрэг үүсгэж , яллагдагчаар татаад байсан юм. Тэгвэл эдгээр гурван хүнийг, тэр дундаа Я.Сод-Эрдэнэ, Г.Дөлгөөн хоёрыг хэргээ тусгаарлуулаад үлдчихсэнд хамт шалгагдаж байсан Хөгжлийн банкны экс захирлууд, ТУЗ-ийн гишүүд ихэд дургүй байгаа гэх яриа гарч байсан ба дээрх 3 хүнтэй холбоотой асуудал хэрхэн бол гэх хардлага иргэдийн дунд таамаг төдий байна.
BOLOD.MN
