Парламентад суудалтай намууд хамтран Засгийн газрыг бүрдүүлж ажиллах боллоо. Ингэснээр сөрөг хүчингүй болж буй тул улс төрийн харилцааны энэ үүргийг УИХ-д бие даан сууж байгаа гурван гишүүн гүйцэтгэхээ амласан юм. Мөн тэдэнд хүч нэмэхээс гадна 2016 оны сонгуулиас өмнө улс төрийн нэр хүндээ өсгөх сонирхолдоо хөтлөгдсөн парламентаас гадуур байгаа намуудад ийм боломж гарч ирж байна.

Иргэний хөдөлгөөний нам, Монголын ногоон нам зэрэг намууд иргэний байгууллагуудтай хамтран сүүдрийн Засгийн газар байгуулахаа мэдэгдлээ. Монголын ногоон намын тэргүүн О.Бум-Ялагч “Сүүдрийн Засгийн газар байгуулж ажиллах нь УИХ-д суудалгүй намууд бодлого чиглэлээ танилцуулах алтан боломж юм” гэв. Сүүдрийн Засгийн газар нь Ч.Сайханбилэгийн Засгийн газрын хуралдаанаар хэлэлцсэн асуудлыг маргааш нь дахин шүүн хэлэлцэж алдаа оноог хэлж, тодорхой шийдлүүдийг санал болгож ажиллах ажээ.

Б.Баяр

Tumen.mn