Өнөөдрөөс эрчим хүчний үнэ нэмэгдсэн тарифаар тооцогдож байна. Эрчим хүчний зохицуулах хороо эрчим хүчний үнэ тарифыг 9.85 хувиар, дулааны эрчим хүчний үнийг 13 хувиар тус тус индексжүүлж хэрэглэгчдэд борлуулна гэж байна. Дулааны хоёр, гурав, дөрөвдүгээр цахилгаан станц, Дархан, Багануур, Налайх, Дорнод бүсийн эрчим хүчний систем зэрэг цахилгаан дамжуулдаг 84 байгууллагын үйл ажиллагаанаас үл хамааран цахилгааны үнийг ийнхүү өсгөжээ. Ингэснээр айл өрхийн сарын нийт хэрэглээ 150 кВт.ц хүртэлх бол 94.10 төгрөг, 150 кВт.ц болон түүнээс дээш хэрэглээтэй бол тус тус нэг кВт.ц-ийг 113.90 төгрөгөөр тооцох болжээ.
Эрчим хүчний зохицуулах хорооны дарга Сайнбуянгийн Отгонбаяр энэ тухай өөрийн биеэр иргэдэд мэдээлэл хийгээгүй. Түүний доод албан тушаалтнууд л эрчим хүчний үнэ чөлөөлөх, индексжүүлэх зэрэг нөхцөл шалтгаанаа тайлбарлаж байсан юм. С.Отгонбаярын хувьд элдэв шүүмжлэлд өртөхөөс айсан биз. Учир нь тэрбээр Онцгой байдлын асуудал эрхэлсэн сайд байхдаа албан тушаалаа урвуулан ашиглаж өмч хөрөнгө идэж уусан гэх хэргээр 4 жилийн ял сонсож, сүүлдээ өршөөлийн хуулиар өршөөгдсөн. Төр түүнд өршөөл үзүүлсэн нь “Чи гэмт хэрэг хийх нь ч хийжээ, гэхдээ энэ удаа өршөөлөө” гэсэн үг. Харин зарим нь түүнийг “цагаадсан” хэмээн цуурсан байна лээ.
С.Отгонбаяр дараа нь Ерөнхий сайд асан С.Алтанхуягтай нөхөрлөж, улмаар Эх орон намаа орхин, АН-д элсэж, 2012 оны сонгуулийн үр дүнгээр Эрчим хүчний зохицуулах хороог удирдах болжээ. Өөрөөр хэлбэл, Н.Алтанхуяг түүнд “бялуу” хүртээсэн хэрэг. Харин одоо түүний удирдсан Эрчим хүчний зохицуулах хорооноос цахилгааны үнэ төлбөрийг тийнхүү нэмэгдүүлсэн нь хууль бус үйлдэл хэмээн Шударга өрсөлдөөн хэрэглэгчийн төлөө газрынхан Захиргааны хэргийн шүүхэд гомдол гаргаад байгаа юм.
Бизнесийн чөлөөт өрсөлдөөнд зүй ёсны монополь аж ахуйн тухай ойлголт байдаг. Үүнд эрчим хүчний салбар хамаардаг. Ийм аж ахуй нь үнийн асуудлаа Шударга өрсөлдөөн хэрэглэгчийн төлөө газарт урьдчилж танилцуулан шийдвэрлэх ёстой ажээ. Гэвч Эрчим хүчний зохицуулах хороо энэ үүргээ биелүүлэлгүйгээр шууд нэмэгдсэн үнэ тарифаа тулган зарлаж, ийнхүү өнөөдрөөс хэрэгжүүлж эхэллээ. Захиргааны хэргийн шүүх энэ маргааныг хэрхэн яаж шийдэхийг л харж суухаас. Цахилгааны үнэ өсөхтэй зэрэгцээд өргөн хэрэглээний бараа бүтээгдэхүүний үнэ тэнгэрт хадах нь тодорхой болоод байна. Хямрал хэдий болтол үргэлжлэхийг таашгүй.
Б.Отгонбаяр
Tumen.mn
