Монголын ардчилсан хувьсгалын 25 жилийн ойн баярын арга хэмжээ өнгөрсөн өдрүүдэд нижгэр болж өнгөрлөө. Ардчиллын анхдагчдын тухай уран зургийн үзэсгэлэн, хүндэтгэлийн хурал, “Хонхны дуу”-г зохиож дуулсан С.Цогтсайханы гэрэлт хөшөөний нээлт гээд олон арга хэмжээ зэрэгцэв. Ардчилсан хөдөлгөөний анхдагчид зураач Л.Хадбаатар, Г.Нороврагчаа нарын “Түүчээ цаг”  үзэсгэлэнгээр олон нийтэд анх удаа уран зургаар хүрч буй нь олзуурхууштай. С.Цогтсайхан агсны хөшөө ч мөн түүхэн дурсгалт бүтээлүүдийн нэг болон мөнхөрч байна. Энэ үеэр харин зарим иргэдийн зүгээс нэг зүйлийг онцолж байлаа. Тэр нь юув гэвэл, 2008 оны 7 дугаар сарын 1-ний аймшигт үйл явдлын үед амиа алдсан таван хүний дурсгалд зориулсан хөшөө босгох талаар талийгаачдын ар гэрийнхний санал, санаачлага одоо болтол биелээгүй байгаа явдал аж. Талийгаачдын ар гэрийнхний төлөөлөл болох н.Энхбаяр гуай хэлэхдээ “2008 оны сонгуулийн луйврыг эсэргүүцсэн иргэдийн хөдөлгөөн бол ардчиллын дархлааг сэргээн хамгаалахыг хүссэн иргэдийн хүсэл тэмүүлэл байлаа. Одоогийн МАН байраа шатаалгаад шинэ байртай болсон. Харин тэнд халуун амиа алдсан таван хүний дурсгалд зориулсан хөшөө босгох асуудал бүрэн шийдэгдээгүй л байна. Газар олдохгүйн зовлон дээр тухайн үеийн дарга нарын хүнд суртал нөлөөлсөн. Сүүлийн үед хотын захиргаа хоёр, гурван газрыг сонгон удахгүй шийдэж, хөшөө бариулна гэсэн” гэж байв. УИХ-ын дарга З.Энхболд ч бас гурван жил гаруйн өмнө “Долоон сарын 1-ний тэмцэл нь ардчиллын дархлааг илэрхийлсэн үйл явдал” гэсэн бол шинэхэн Ерөнхий сайд Ч.Сайханбилэг саяхан “Ардчилсан хувьсгал үргэлжилж байна”  гэсэн нь тэдгээр амь үрэгдэгсдэд хамааралтай биз ээ.   

Б.Баяр 

tumen.mn