Ч.Сайханбилэгийн Засгийн газар бүрэн бүрэлдэхүүнээр ажиллах боллоо. Өчигдөр шөнө болтол хуралдсан УИХ-ын чуулганы нэгдсэн хуралдаан сайд нараа бүгдийг нь батламжлав.
Өнгөрсөн долоо хоногийн баасан гарагийн шөнө С.Баярцогтыг Засгийн газрын Хэрэг эрхлэх газрын даргаар томилох тухай хэлэлцэж эхлээд байсныг энэ өдөр үргэлжлүүлэн хэлэлцэж, түүнийг 75 хувийн саналаар батлав. С.Баярцогтыг шүүмжлэх хүн харин олон байв. Г.Уянга гишүүн, “Ийм хариуцлагагүй хүнээр ЗГХЭГ-ын дарга хийлгэх болсонд харамсаж байна. Энэ хүн Оюу толгойн гэрээг хамгийн муу хэлбэрээр байгуулахад гар бие оролцож гарын үсгээ зурсан” гэсэн юм.
Хурлын явцад Аж үйлдвэрийн сайдад нэр дэвшигч Д.Эрдэнэбат зэрэг зарим хүмүүсийг аравхан минутанд багтаан баталж байлаа. Аж үйлдвэржилтийн асуудал онцгой ач холбогдолтой энэ цаг үед шинээр байгуулагдаж буй яамыг нь толгойлох хүнээс дорвитойхон нэг ч асуулт асуугаагүй нь гайхал төрүүллээ. Энэ талаар Ц.Даваасүрэн гишүүн “Ингэж шууд батлаад байж болохгүй” гэснээр гишүүд дараагийн хүмүүс дээр нэлээд тогтож ярилцах болсон юм.
Хууль зүйн сайдад нэр дэвшигч Д.Дорлигжаваас гишүүд хэд хэдэн зүйл асууж, санал шүүмж хэлэв. Сайд асан Х.Тэмүүжингийн болиулсан төрийн тусгай албан хаагчдад зориулан барьж байсан эмнэлэгийг зориулалтынх нь дагуу барьж ашиглахыг анхаарууллаа. Мөн хууль эрх зүйн шинэчлэлийн явцад алдаатай зүйл гарч буйг засч залруул гэлээ. Манай эрх зүйн систем хаашаа явж байгаа, Грек ромынх уу, Англи сагсоных уу, эсвэл аль нь ч биш холимог болж байгаа юм уу, үүнийг нэг талд нь гаргах хэрэгтэй бус уу хэмээн сонирхож байв. Д.Дорлигжав харин “Эрх зүйн холимог системийг хэрэглэсэн улс орон дэлхийд хаана ч байхгүй” гэсэн юм. Өөрөөр хэлбэл, Х.Тэмүүжингийн хэлээд байсан эрх зүйн онолын холимог системээр явах нь буруу гэж тэр үзэж буй ажээ.
Чуулганы хуралдаан ажлын цагт багтахгүй тул цагаа сунгасан нь шинээр томилогдсон зарим сайд нарыг чилээсэн бололтой, Шадар сайд У.Хүрэлсүх, Хууль зүйн сайд Д.Дорлигжав нар удалгүй танхимаас гарч явсан юм. Энэ нь Д.Тэрбишдагвыг ундууцахад хүргэж орхив. Тэрбээр “Энд сая томилогдсон сайд нар бүгдээрээ сууж, яригдаж байгаа зүйлсийн талаар бичиж тэмдэглэж авах ёстой байсан юм. Гэтэл Д.Дорлигжав мэтийн нөхөд их юм мэддэг хүн шиг пээдийгээд гараад явчихлаа” гэж байлаа.
Зам тээврийн сайдад нэр дэвшигч Н.Төмөрхүүгийн талаарх Байнгын хорооны танилцуулгад зөрүүтэй зүйл байгааг Эдийн засгийн байнгын хорооны дарга Б.Гарамгайбаатар сонирхон асуухад тэр “Техникийн алдаа гарсан байна. Би төрд 17 жил ажиллаагүй. Сайдын зөвлөхөөр 6 сар л болсон” гэх хариулт өгсөн юм. Түрүүчийн долоо хоногт Байнгын хороогоор оруулж амжаагүй Эрүүл мэндийн сайдад нэр дэвшигч Г.Шийлэгдамба, Батлан хамгаалахын сайдад нэр дэвшигч Ц.Цолмон нарыг Байнгын хороо нь дэмжиж, УИХ-д шууд оруулж хэлэлцүүлэв.a
Товчдоо, шинэ сайд нар “ногоон” гэрлээр ийнхүү саадгүй гарч ирсэн энэ удаагийн чуулганы хуралдааныг ерөнхийд нь анзаарахад цаг минуттай уралдан бушуухан батлаад байх эрмэлзэл өндөр байлаа. УИХ-д суудалтай намууд зөвшилцөлд хүрч, 19 сайдтай, 16 яамтай шинэ Засгийн газрыг хамтан байгуулах болсон нь энд онцгой нөлөөлсөн ч эдийн засгийг эрчимжүүлж, хямралт байдлыг даван туулах зэрэг эдийн засаг, улс төрийн шийдлээ хүлээсэн олон чухал асуудлууд тулгарсан ийм хүнд үед зарим сайд нар дээр арай хөнгөн хандав уу гэх сэтгэгдэлтэй үлдэх хүн ч цөөнгүй бололтой.
Б.Отгонбаяр
Эх сурвалж: Tumen.mn
