"Эрдэнэс Монгол нэгдэл"-ийн охин компани буюу "Эрдэнэс Алт Ресурс" ХХК-ийн үүсэн байгуулагдсаны 5 жилийн ой энэ жил тохиож байна. Уг ойг тохиолдуулан өнөөдөр "Эрдэм шинжилгээ, онол практикийн бага хурал" зохион байгуулагдаж байна. "Эрдэнэс Алт ресурс" ХХК-ийн тухайд алт болон мөнгөний баяжмал үйлдвэрлэн, экспортлодог төрийн өмчийн компани. Энэ ч утгаараа улсын төсөвт томоохон жин дарах хувь нэмрийг оруулаад зогсохгүй орон нутгийн төсөв бүрдүүлэхэд чухал үүрэг гүйцэтгэсээр ирсэн. Тухайлбал: Монгол улсын ерөнхийлөгчийн 2020 оны 01 дүгээр сарын 03-ны өдрийн 01 дугаар захирамжаар ахмадын тэтгэвэрийн зээлийг нэг удаа тэглэж байсан. Уг зээлийн нөхөн төлбөрийг Эрдэнэс Алт ресурс ХХК Салхитын мөнгөний ордын мөнгөний баяжмалаас олсон орлогоор бүрдүүлэн дуусч байгаа билээ. Уг эрдэм шинжилгээ, онол практикийн бага хуралтай холбогдуулан "Эрдэнэс Алт Ресурс" ХХК-ийн гүйцэтгэх захирлын үүрэг гүйцэтгэгч Э.Ууганбаяр ийнхүү хэлэв.

"Эрдэнэс Алт Ресурс" ХХК-ийн гүйцэтгэх захирлын үүрэг гүйцэтгэгч Э.Ууганбаяр: "5 жилийн өмнө нэг уул уурхайн компани байгуулагдаж байсан бол өнөөдөр манай компани мөнгөний баяжмал экспортлох, хоёр аймгийн нутаг дэвсгэрт 7 талбайд хайгуулын үйл ажиллагаа явуулж байгаа томоохон хэмжээний компани болон өргөжөөд байна. Өнгөрсөн хугацаанд 27,9 мянган тонн мөнгөний баяжмал үйлдвэрлэж, 27,6 мянган тонн мөнгөний баяжмалыг экспортлон улс болон орон нутгийн төсөвт 77 тэрбум төгрөгийг төвлөрүүлээд байна. Мөн Эрдэнэс бондын төлбөрт 215,5 тэрбум төгрөг төвлөрүүлжээ.

Цаашид бид бүхэн алт, мөнгөний үндсэн ордын хайгуулын ажлыг эрчимжүүлж, нөөцийг ашигт малтмалын улсын нэгдсэн санд бүртгүүлэх, бүртгүүлсэн нөөцийг үр ашигтай, хаягдал багатайгаар ашиглах, үүсмэл ордыг ашиглах, уурхайн нөхөн сэргээлт, хаалтын ажлыг хариуцлагатай гүйцэтгэх төлөвлөгөөтэй ажиллаж байна. Дээр дурьдсан ажлуудыг хийж гүйцэтгэхэд та бүхний үнэтэй зөвлөгөө зөвлөмж, дэмжлэг туслалцаа чухал байх нь гарцаагүй. Мөн стратеги төлөвлөгөөндөө тусгагдсан ажлыг Эрдэнэс Монгол нэгдэлийн нэгдсэн бодлогод нийцүүлэн төр хувийн хэвшлийн түншлэлийн хүрээнд гүйцэтгүүлэх хэрэгцээ шаардлага тулгараад байна." хэмээн онцлон тэмдэглэлээ.