Дан дээлтэй сайд, МАН-ын Ерөнхий нарийн бичгийн дарга Д.Амарбаясгалан Баруун бүс буюу Говь-Алтай, Увс, Ховд, Завхан аймгийг сонгон, нэр дэвшихээр явахад гайхах хүн олон байсан болов уу. Учир нь хамгийн өрсөлдөөнтэй тойрог бол хоёрдугаар тойргийн 10 мандат байв. Тухайн үедээ бүс нутагтаа олон удаа тодорчихсон, мөнгөтэй бол мөнгөтэй, нэр хүндтэй бол нэр хүндтэй нэр дэвшигчдийн дунд их л бүдэгхэн дүр харагдаж байсныг нуух юун.
Гэтэл өнгөний эхэнд давхиад ирж байгаагаас харахад тэр бол яах аргагүй стратегич юм байна гэхээс өөр хэлэх үг алга. Үүний зэрэгцээ МАН хэмээх том айлын гал тогоо, Засгийн газрын гал тогоотой хамт барьж байгаа хүн шүү дээ. МАН ч үнэмлэхүй гэж болохоор яллаа. Өөрөө ч үнэмлэхүй ялж байгаагийн цаана бага залуугаас НИТХ-ын төлөөлөгчөөс эхлээд ажилласан. МАН-ын дээд үеийн лидерүүдээс үг сонсчихсон хүн аргагүй өөр байгааг олон зүйл дээр харж болно. Д.Амарбаясгалан МАН-ын 2016 оны их ялалтын дараа НИТХ-аас Ерөнхий нарийн бичгийн даргаар ирсэн цагаас хойш 2016 оны Орон нутгийн, 2020 оны УИХ, Орон нутгийн, 2021 оны Ерөнхийлөгчийн, 2024 оны УИХ-ын сонгуулийн ялалтын стратегийг зурж, удирдсан хүн яах аргагүй мөн.
Хамгийн сүүлийн жишээ гэхэд “Шинэ хоршоо”-ны тухай хуулийг санаачилан батлуулж, түүнийг хөдөлгөөн болгон өрнүүлж, олон малчин өрх, хоршоонд хөнгөлөлттэй болон урт хугацааны зээлийн дэмжлэгийг ямар ч саадгүй гаргаж өглөө. Энэ нь Д.Амарбаясгалан гэх хувь улстөрчийн рейтингийг богино хугацаанд өсгөж, сонгуульд ялах нөхцлийг бүрдүүлсэн байж болно. Гагцхүү “Шинэ хоршоо” хөдөлгөөн нь зуд турьханд малаа алдаж, гар мухарласан малчдад ямар хэрэгтэй зүйл болохыг малчид өөрсдөө сайшаан ярьж байна.
Үүнд л түүний стратеги оршиж байна. Өргөн олонд ч хэрэгтэй өөртөө ч хэрэгтэй төлөвлөгөө гаргаж чадаж байна, түүнийгээ хэрэгжүүлж чадаж байна. Энэ нь зөвхөн Д.Амарбаясгалан гэх хувь улстөрчийн стратеги ч биш. МАН-ын ялалтын страеги байв. Цаашилбал, малчин түмэн, монголчуудын стратеги байлаа.
Тэрбээр арван хэдхэн настай МАН-ын босгыг алхаж ирсэн цагаас хойш хорин хэдхэн настай НИТХ-д төлөөлөгч, тэргүүлэгчээр ажиллаж байгаад МАН-ын Ерөнхий нарийн бичгийн даргаар сонгогдон ажиллахдаа дөрвөн удаа улиран сонгогдоод буй бас нэг содон амжилтын эзэн. Сайн байсан учраас л дахин дахин улираан сонгоод байгаа хэрэг шүү дээ. Магадгүй Ю.Цэдэнбалаас хойш МАН-ын Генсекээр хамгийн удаан ажиллаж байгаа дарга байх. Тэр нэгэн цагт Монгол Улсын стратегийг зурж байсан П.Жасрайн хүү Ж.Жанцантай хамтран ажиллаж байсан зэрэг нь ийнхүү эрт хэрсүү суулгасан байх. Тиймдээ ч тэр өнөөдөр МАН-ын бүү хэл Монгол Улсын стратегич болчихсон бололтой.
Tumen.mn
