-Ямархуу улстөрч болсон, хэний төлөө зүтгэхийг чинь одоо л харъя, Л.Оюун-Эрдэнэ ээ!-

-Харахад олон нам, эвслийн тогтолцоо мэт харагдаж байгаа парламент дахь энэ шинэ бүтцийн хэд нь, хэн нь “Женко”-гийн халаасанд байгааг мэдэр. Тэр л чиний луужин!-

МАН ялалт байгууллаа. Ялна гэж мэдэж байсан ч ялсны дараа яах нь илүү сонин байсан. Дангаараа Засгийн газар байгуулаасай, одоогийн хийж байгаа ажил, хэрэгжүүлж байгаа бодлогоо үргэлжлүүлээсэй гэсэндээ намаа ялуулсан гишүүд, дэмжигчид нь “Хамтрах санал”-ын тухай сонсоод нулимж нэг, нулимсаа арчиж нэг гомдоллож байна. Арга ч үгүй юм. Жинхэнэ ширүүн “тулаан” орон нутагт өрнөж, МАН-ынхныг эсэргүүцсэн “олон мөрний цутгалангаас ирсэн үер” дунд нүцгэн шалдан туучиж байж ялуулсан юм чинь. Өнөөх олон мөрний цутгалан дунд нь “Ялагч” удирдлага нь “Одоо найзалъя, хүрээд ир” гэхээр орон нутагт өөр зуураа тэмцэлдсэн өс хонзон, эрх мэдэл албан тушаалын төлөөх “бага газрын том өрсөлдөөн” л үлддэг юм байна. Тэдэнд орон нутгийн сонгуульд намаа ялуулахсан гэх ирмүүн эр зориг үгүй болж, дээгүүрээ эвлэрчихдэг юм чинь энүүхэн зуураа эвдрэлцээд яахав” гэсэн үл итгэлцэл л үлдэнэ. Гэтэл парламентын сонгууль бол төрийн сонгууль. Орон нутгийн сонгууль бол нийгмийн сонгууль. Нийгмийн сонгууль нь ард иргэдийн амьдралд илүү ойрхон байдаг. Ингээд ялсан нам дангаараа Засгийн газраа байгуулах уу, хамтарсан Засгийн газар байгуулах уу гэдгээс Засгийн газрын бүтэц, бүрэлдэхүүн, орон нутгийн сонгуульд ялах эсэх, улмаар иргэдийн амьдралд хэрхэн нөлөөлөх нь шалтгаалах болоод байна.

Ерөнхий сайдын тухайд одоо мэдэгдэж байгаагаар АН, ХҮН-д хамтарч ажиллах санал тавьсан гэсэн мэдээлэл цацагдсан. Мөн нэгэн томоохон хөтөлбөрийг хүлээн зөвшөөрөх эсэхээр нь дэнчин, босго тавьсан гэдэг мэдээлэл байна.

Энэ хөтөлбөр нь юу байв? Тийм ч нууцлаг, цоо шинэ зүйлгүй, ерөөсөө л “Шинэ сэргэлтийн бодлого”-оо л “тулгаад” байгаа юм билээ. Тухайлбал “Эрчим хүчний реформ”, “20 минутын хот” буюу хотын түгжрэл, хот тэлэлтийн асуудал, Баялгийн сан, Авлигатай тэмцэх зэрэг том хөтөлбөрүүдээ хамтарч хэрэгжүүлэхгүй бол хамтрахгүй. Улс орны нийтлэг эрх ашгийг энэ хөтөлбөрийн хэмжээнд хүлээн зөвшөөрч харж, хэрэгжүүлнэ гэвэл хамтарвал хамтаръя. Хамтрахгүй бол МАН дангаараа Засгийн газраа байгуулаад ажиллана гэсэн болзол юм байна.

Тэгэхээр хэдэн сайдтай байх, хэн, юуны сайд нарыг ярих хэтэрхий эрт байгаа юм. Эхлээд энэ хөтөлбөрөө батлаад, дараа нь Засгийн газрын бүтцээ Шинэ Зеландын загвараар байгуулна. Шинэ Зеландын тэр бүтэц нь пропорциональ системийн үр дүнд байгуулагдсан хамтарсан Засгийн газрын хамгийн сонгодог жишээ. Ингэж бүтцээ зурсны дараа бүрэлдэхүүнээ буюу хэн нь юуны сайд байхаа гурван талаасаа ярилцъя гэж байгаа юм билээ.

Ер нь Ерөнхий сайд дангаараа Засгийн газраа байгуулж чадах уу? Үүнийг зөвхөн намынхан нь бус, нийт сонгогчид хүсч байгаа шүү дээ. Миний урьд нь хатуурхан бичиж байсанчлан У.Хүрэлсүхийн байгуулж байгаад тараасан буюу “Зулбасан Засгийн газрын буурин дээр” ажилласан залуухан Ерөнхий сайдын хувьд өөрийн түүхээ бичиж, өөрийн зүрх сэтгэлээ сонсож, уураг тархиныхаа тушаалаар танхимаа санаачлан байгуулаад тэр “Шинэ сэргэлтийн бодлогоо” үргэлжлүүлж яагаад болохгүй гэж?

Хэрвээ төсвөө батлуулахад чагт, хориг дунд чангалуулна гэж айгаад байгаа бол УИХ-ын дарга нь урт замын хамтрагч Д.Амарбаясгалан чинь болох юм байна шүү дээ. Төв банкны удирдлагууд мөн л тэнд зангидагдана. Л.Оюун-Эрдэнийн “Шинэ сэргэлтийн бодлогод” саад болох өөр юу байгаа юм бэ? Хатуу хяналт, олон талын тогтолцоог тэр өөрөө хүсч хийсэн биз дээ? Эрх баригч нам сөрөг хүчнээ Засгийн газартаа урина гэдэг тун учир начиртай байдаг.

Дахиад хэлэхэд Ч.Сайханбилэг бол хоёр сонгуулийн тэг дунд, Ерөнхий сайд болсон өдрөө МАН-ыг Засгийн газартаа урьж байсан. Сана даа, яг 10 жилийн өмнө. Хамтрах урилгаа өгчихөөд тухайн үеийн намын дарга З.Энхболд, С.Баярцогт нартай Ерөнхий сайд болсон баяраа тэмдэглэнгээ, МАН урилгад нь яаж хандах бол гээд яриад сууж байсан. Тэр үед намын ах нар чинь цангасан мал шиг давхиад тэр шалбааг шавхруун дээр ороод хэдэн сар сайд хийж байгаад гарна билээ. Гоё байсан уу, ямар санагдаж байсан бэ?

Гэтэл Л.Оюун-Эрдэнэ ээ, Та бол бүх ард нийт сонгогчдын итгэлийг хүлээсэн эрх баригч намын дарга, Ерөнхий сайд. Сонгуулийн эхний жилийнхээ гараан дээр юун “Хамтрах” яриад солиороод байгаа юм бэ? Хэнд хэрэгтэй, хэнийг баярлуулах гэж тэр вэ?

“Хамтрах урилга”-ын сурагаар АН-ынхан даргаа солих тухай шуугиж эхэллээ. УИХ дахь АН-ын бүлгийн даргаар нь Монгол Улсын хөгжлийг олон жил чөдөрлөж, тушиж, хохироосон Х.Баттулга болох тухай яригдаж эхэллээ. Энэ бүхэн сайхан байна уу?

Яг юу хүсээд байгаагаа хэлчихээд нийтлэлээ дуусгая. Дангаараа Засгийн газраа байгуулчих. Бодлого чинь зөв байхад ард иргэд чинь дэмжинэ. Эрх баригч нам сөрөг хүчний тавьсан шаардлага, хяналтад авах гээхийн ухаанаар хандаж хамтарч ажилладаг болохоос заавал тэврэлдэж нялуураад байх албагүй. “Нэгээр илүү бол мянгаар илүү” гэсэн зарчмаар ажиллаж эрхээ ч дангаараа эдэлж, хариуцлагаа ч дангаараа үүрэх зоригтой бай. Танаас хүлээх цор ганц зүйл гэвэл улс орныхоо язгуур эрх ашгийг хамгаалж, гадны гар хөл болж бодлогыг шингээж хэрэгжүүлж, хөгжлийг гацааж байсан Х.Баттулгатай хамтрахаар болчихсон байвал яасан ч уучлахгүй шүү!

Улстөрч Л.Оюун-Эрдэнэ Та зүрхээ чагна, нүдээ нээ, мэдрэмжээ хөглө! Харахад олон нам, эвслийн тогтолцоо мэт харагдаж байгаа парламент дахь энэ шинэ бүтцийн хэд нь, хэн нь “Женко”-гийн халаасанд байгааг мэдэр. Юун дээр нэгдсэн, “Женко” аль нам, эвслийг халаасалсныг тэмтэр. Тэр л чиний луужин! Ямархуу улстөрч болсон, хэний төлөө зүтгэхийг чинь одоо л харцгаая. Амжилт хүсье!

Нийтлэлч У.Оргилмаа