Дэд сайд болох магадлалтай хүмүүсийн эгнээнд МАН-аас Г.Тэмүүлэн, Ч.Ганхуяг багтаж байна. МАХН, МҮАН-ын “Шударга ёс” эвслээс Ж.Амарсанаа, Б.Цогтгэрэл нар улиран томилогдох бололтой. Ардчилсан намаас Цөмийн энергийн газрын дарга Н.Тэгшбаяр, Ерөнхий сайд Н.Алтанхуягийн зөвлөх асан М.Хүдэрбаатар нар ч бас дэд сайдын марафонд нэгджээ. Тэд Ерөнхий сайд асан Н.Алтанхуягийн хүмүүс гэдэг.
Г.Тэмүүлэнгийн хувьд “Эрдэнэт”-ийн Ганзоригийн хүү юм. Тэрбээр С.Баярын Засгийн газрын үед Оюутолгойн гэрээг үзэглэхэд Монголын талаас ажилласан хүмүүсийн нэг. Одоо ч “Оюутолгой” ХХК-ийн ТУЗ-д Монголын талаас төлөөлж байгаа. Тиймээс Уул уурхайн дэд сайд болох магадлал өндөр байгаа ажээ. Харин Ч.Ганхуягийн хувьд С.Батболдын Засгийн газарт Сангийн дэд сайдаар ажиллаж байсан, МАН-ын туршлагатай эдийн засагчдын нэг юм. МАХН, МҮАН-аас Ж.Амарсанаа, Б.Цогтгэрэл нар харин дэд сайд хэвээр үлдэж магадгүй гэж эх сурвалжууд хэлж байна. Ж.Амарсанаа нь Эрүүл мэндийн дэд сайд, Б.Цогтгэрэл нь Аж үйлдвэрийн дэд сайдаар ажиллах магадлалтай байгаа ажээ.
Цөмийн энергийн газрыг татан буулгасанд тус агентлагийн даргаар ажиллаж байсан Н.Тэгшбаяр нэлээд гомдолтой яваа юм. Тэрбээр, Засгийн газар огцрох чимээгээр энэ тухай анх мэдээлэл сонсоод “Намайг зайлуулахын тулд танан буулгах гэж үү” хэмээн уцаарласан гэдэг. Тиймээс түүнийг тайтгаруулахын тулд дэд сайд болгох болов уу. Мань хүн мөн л Н.Алтанхуягийн хүн гэнэ лээ. Ерөнхий сайд Ч.Сайханбилэг Н.Тэгшбаяраас татгалзахгүй биз. Яагаад гэвэл, тэд нэг тогоонд амт “буцалж” байсан улс.
Б.Баяр
Эх сурвалж: Tumen.mn
