Үндэсний статистикийн хорооноос гаргасан энэ оны эхний 11 сарын мэдээллээр гадаад худалдааны нийт эргэлт 10 тэрбум ам.доллар болжээ. Энэ өнгөрсөн оны мөн үеэс 300 сая доллараар нэмэгдсэн үзүүлэлт аж. Экспорт 34 хувиар өсч, 5 тэрбум 190 сая доллар болсон бол импорт 17.5 хувиар буурч 4 тэрбум 832 сая доллар болсон байна. Гадаад худалдааны тэнцэл 358.2 сая долларын ашигтай гарчээ.

Зэсийн баяжмалын экспорт 2 тэрбум 288 сая доллар болж, өнгөрсөн оны мөн үеийнхээс 1.4 тэрбум доллар буюу 2.7 дахин нэмэгджээ. Зэсийн баяжмалын экспорт дангаараа нийт экспортын 44 хувийг бүрдүүлж байна. Чулуун нүүрсний хувьд 16.9 сая тонныг экспортолсон нь өнгөрсөн оны мөн үеэс 0.8 сая тонноор өсчээ. Харин экспортын орлого нь 242 сая доллар буюу 24 хувиар буурч 760 сая доллар доллар болов. Нүүрс нийт экспортын 15 хувийг бүрдүүлжээ.

Газрын тосны экспорт өнгөрсөн оны мөн үеэс 1.8 сая баррель буюу 40%-иар өсч, 6.3 сая баррельд хүрчээ. Экспортын орлого 34.6 хувь буюу 155 сая доллараар өсч 601.6 сая доллар болжээ. Нийт экспортын 12 хувийг газрын тос бүрдүүлж байна.  

Төмрийн хүдрийн экспорт 5.5 сая тонн болж, өнгөрсөн оны мөн үеэс 0.5 сая тонноор буурсан байна. Экспортын орлого 400.7 сая доллар болж 32 хувь буюу 190 сая доллараар буурчээ.  

Алтны экспорт 1 тоннор нэмэгдэж, 8.4 тонн болжээ. Экспортын орлого 342.7 сая доллар болж, 39 сая орчим доллараар нэмэгдсэн байна.

Б.Баяр

Эх сурвалж: Түмэн.мн