Манай салбар бүрд бодлогын шинэчлэл, дэлхийн хөгжлийг дагасан өөр арга барил хэрэгтэй байгаа. Тиймээс үүнийг олж харсан Гэр бүл, хөдөлмөр, нийгмийн хамгааллын яамнаас Азийн бүтээмжийн байгууллага, Монголын бүтээмжийн холбоотой хамтран үндэсний бүтээмжийн үзэл баримтлалыг тодорхойлж, үндэсний хэмжээнд бүтээмжийн хөдөлгөөнийг эрчимжүүлэх зорилго бүхий “БҮТЭЭМЖИЙН ХУВЬСАЛ” чуулганыг зохион байгуулсан нь цаг үеэ олсон арга хэмжээ байв. Энэ үеэр Л.Энх-Амгалан сайд “Өнөөдрийн байдлаар Монгол Улсын хөдөлмөрийн дундаж бүтээмж дэлхийн дунджаас 3.6 дахин, БНСУ-аас 5.4 дахин бага байна. Хөдөлмөрийн бүтээмж нь цалин хөлстэй шууд хамааралтай. Манай улсад уул уурхай, мэдээлэл технологийн салбар хамгийн их бүтээмжтэй, цалин өндөр байна. Тиймээс БҮТЭЭМЖИЙН ХУВЬСГАЛЫГ өрнүүлж, төр, хувийн хэвшлийн бүх түвшинд бүтээмжийг нэмэгдүүлэх бодлого, зохицуулалт, арга хэмжээг төлөвлөж хэрэгжүүлнэ” хэмээн байр сууриа илэрхийлэв. Монгол Улсын Засгийн газар, түүний яамд бол бодлого гарган, түүнийгээ хэрэгжүүлэх үүрэгтэй.