Монгол Улсын Засгийн газрын ээлжит хуралдаанаас гарсан шийдвэрийг танилцууллаа.

Энэ үеэр Аж үйлдвэр, эрдэс баялгийн сайд Ц.Туваан дараах мэдээллийг өглөө.

-Өнөөдөр нэлээд удаан хугацаанд яригдсан Гашуунсухайт-Ганцмодын хил холболтын хоёр улсын Засгийн газар хооронд яригдсан хэлэлцээрийг соёрхон батлуулахаар ЗГ-ын хуралдаанаар хэлэлцэж УИХ руу оруулах шийдвэр гаргалаа.

Салбарын сайд, ажлын хэсэг ахалсан хүний хувьд энэ шийдвэр гарч байгаад баяртай байна. Учир нь энэ шийдвэр батлагдсанаар араасаа маш олон эерэг нөлөөллүүдийг авч ирнэ. Ялангуяа нүүрсний үнэ унаж байгаатай холбоотой нүүрснээс олох орлого багсаж улсын төсөв тасалдах эрсдэл үүсэж байгаа энэ цаг үед дээрх шийдвэр маш чухал байгаа.

Бид энэ хэлэлцээг соёрхон батлуулсны дараа компани хоорондын компани хоорондын гэрээ хийгдэж Чайна энержи компани нэмж 5 сая тонн коксжих болон бусад нүүрсийг боловсруулах боломж бүрдэнэ.

Мөн энэ хил холболтын төмөр замын асуудал нь ганц Гашуунсухайт-Ганцмодын асуудал биш. Цаашлаад Ханги-Мандал, Шивээхүрэн-Сэхээ, Бичигт-Зүүнхатавч бүр цаашлаад гурван улсын хооронд баригдаж буй төмөр замын баруун, зүүн коридорын асуудал. Мөн бид өмнө нь урд хөрштэйгөө зогсонги байдалд орсон дараагийн томоохон төслүүдийг хөдөлгөх том боломж бүрдсэн шийдвэр гарлаа гэж ойлгож болно.

Хаврын чуулганы хамгийн эхний асуудал Гашуунсухайт-Ганцмодны хил холболтын төмөр замын хоёр улсын Засгийн газар хоорондын хэлэлцээг батлах.

Мөн Монгол Улс 2022 оноос хойш уул уурхайн биржээр хуулийн дагуу нүүрсээ арилжаалдаг болсон. Энд нэг зүйл байгаа нь уул уурхайн биржээр арилжаалагдсан нүүрс маань 3-4 сарын дараа хил нөхцөлөөр хүлээж авах байгууллагадаа хүрдэг. Яг өнөөдрийн байдлаар он гарснаас хойш 12.4 сая тонн нүүрс Монгол Улсаас экспортод гарсан гэдэг мэдээлэл байна.

Харин үнийн хувьд мэдээж буурсан. Хүлээлттэй байгаа. Энэ нь давагдашгүй хүчин зүйл буюу дэлхийн худалдааны асуудалтай холбоотой хүндрэлээс үүссэн. Гэхдээ үүнтэй холбоотойгоор төсөв тодотгох хэмжээний асуудал үүсээгүй.

Төсвийн орлого бүрдүүлэлт дээр үүсэж байгаа энэ орон зайг бид Б төлөвлөгөө гаргаж экспортыг дэмжих ажлын хэсгийн Сангийн сайдаар ахлуулан шийдвэрлэх шийдвэр гарсан.

Манай яамны тухайд биржээр арилжаалагддаг бүтээгдэхүүнүүд буюу нүүрс, зэс, төмөр, жонш, цайр зэрэг бүтээгдэхүүн бүр дээр олборлолт экспортоо нэмэгдүүлснээр гарч байгаа дутагдлыг нөхнө гэсэн зорилттой ажиллана. Бас алтны олборлолтыг нэмэгдүүлэх асуудлын өмнөх хуралдаанаар ярьсан. Уг асуудлыг ч гэсэн Б.Жавхлангийн ахалсан ажлын хэсэг бодитой үр дүн рүү оруулж Монгол Улсын алтны экспортыг нэлээд хэмжээгээр нэмэгдүүлэхийн төлөө ажиллана.