Хүнд тус хүргэхэд заавал баян, эсвэл аз жаргалаар дүүрэн байх албагүй. Хүсэл л байхад бүх зүйл болно гэдгийг Британийн нэгэн орон гэргүй эр харуулж чаджээ. Робби хэмээх нэртэй энэ эрийн үйлдэл хүмүүсийн сэтгэлийг хөдөлгөж, Британийн хэвлэлүүд түүний талаар хөндөн бичиж байна. 

 

22 настай Доминика Харрисон-Бетсон хэмээх оюутан бүсгүй хэд хоногийн өмнө харих гэтэл гэртээ банкны картаа үлдээсэн байжээ. Тэрбээр картнаасаа бэлэн мөнгө авах гэж байхдаа үүнийгээ мэдсэн байна. Энэ үеэр Доминикагийн ойролцоо гудамжны эр зогсож байсан бөгөөд охины үйлдэл бүрийг ажиглаж байжээ. 

Харих ч мөнгөгүй болоод сандарсан охиныг харсан тэрбээр огт бодож санасан юмгүй тус хүргэхээр шийдэж, өөрт байсан сүүлчийн гурван фунтыг өгч, таксинд суулгаж өгсөн байна. Охин уг нь түүний мөнгийг авахгүй гэсэн боловч Робби өөрийнхөөрөө зүтгэсээр тусалжээ. 

 

Энэ явдлын дараа Доминика олон нийтийн сүлжээгээр Роббид мөнгө цуглуулах хуудас нээсэн байна. Тэрбээр интернэт хэрэглэгчдэд хандан гудамжны эрд байрны сарын түрээсийн мөнгө хандивлахыг уриалжээ. Орон гэргүй баатрын тухай уг мэдээлэл дорхноо интернэтээр цацагдаж, түүний талаар олон хүн сайхан үг бичсэн байна. Зарим хүний бичсэнээр Робби зөвхөн Доминикад туслаагүй аж. Энэ эр хүйтэн байхад даарсан нэгэнд ороолтоо зүүж өгч, хоолоо хувааж идэж байсан түүхтэй гэнэ.

 

Ингээд долоо хүрэхгүй хоногийн хугацаанд гудамжны эрд 3000 орчим фунт цугларсан байна. Энэ мөнгө Роббиг шинэ амьдралаа эхлүүлэхэд хангалттай хүрэлцэнэ.