УИХ-ын чуулганы өнөөдрийн /2025.12.18/ үдээс хойших нэгдсэн хуралдаанаар Монголбанкны ерөнхийлөгчөөр С.Наранцогтыг томилох асуудлыг хэлэлцэн, С.Наранцогтыг Монголбанкны ерөнхийлөгчөөр томилохыг дэмжье гэсэн томъёоллоор нууц санал хураалт явуулахад хуралдаанд оролцсон гишүүдийн олонх дэмжив.

Монголбанкны ерөнхийлөгчөөр С.Наранцогтыг томилсон УИХ-ын тогтоол батлагдаж, Бядрангийн Лхагвасүрэнгийн бүрэн эрхийн хугацаа дууссантай холбогдуулан Монголбанкны ерөнхийлөгчийн албан тушаалаас чөлөөллөө.

УИХ-ын чуулганы нэгдсэн хуралдааны өмнө УИХ-ын дарга Н.Учрал ирц бүртгэж, Засгийн газрын гишүүд ирцээ бүртгүүлээгүй байгааг дурдаад, "Сайд нар ажилдаа түүртээд байвал хэлээрэй. Сайдын ажлын албыг УИХ-ын гишүүнтэй хавсарч хийхэд бас түүртдэг ажил шүү.

Сайд бол хувийн зохион байгуулалт өндөртэй хүний хийдэг ажил шүү. Сайд, гишүүний ажлын аль алиныг амжуулах боломжтой, хувийн зохион байгуулалт өндөртэй, мэдлэг туршлага өндөртэй, ажил хийх эрмэлзэлтэй, ид хийж бүтээх насандаа яваа залуус олонхийн бүлэг олон бий шүү. Ийм хүмүүс энэ байдлаа намын даргадаа уламжлаад байгаа гэдгийг сайд нарт сануулъя" гэв.