Аж үйлдвэр, эрдэс баялаг бол стратегийн хамгийн том түшиц талбар, Монгол Улсын санхүүг бэхжүүлэх, олон улсад цар хүрээг өргөжүүлэх, ирээдүйг тодорхойлох асар том салбар. Гэтэл яахаараа Гонгорын Дамдинням гэх нөхөрт өгчихдөг байна,аа. Хамгийн наад зах нь шатахуун, түлшээ татаж авч чадахгүй намрын сарыг барж, өвлийн сарыг дундлаад явж байгаа сайдаар яах юм. Иргэдийн бухимдал дээд цэгтээ хүрлээ. МАН-ын дарга Н.Учрал аа, Ерөнхий сайд Г.Занданшатар аа яагаад ийм сайдыг нэг нь намаасаа нэр дэвшүүлж, нөгөө нь танхимдаа байлгаад байгаа юм бэ. Тэр үүгээрээ МАН-ыг чинь, Засгийн газрыг чинь арчаагүй дорой харагдуулж байгааг ядахад бодож үзээч.

Өнөөдөр шатахуун, түлшээ нөөцлөчихөж чадахгүй байж эрдэс баялаг, уул уурхайн салбарт бусдыг хардаж, хий зүйл булаалдсан нэг сайданцар таны танхимд байгаа нь Г.Дамдинням. Тэгээд ч түүнд стратегийн хамгийн том түшиц энэ талбар дэндүү томдож байна. Шатахуун түлшээ л татаад нөөцлөчих.

Өнөөдөр Улаанбаатар төдийгүй Монгол Улсын нийгмийн бухимдал дээд цэгтээ тулсан. Энэ бухимдлын галыг өрдөж байгаа гол зүйл нь шатахуун, түлшний олдоц. Тодотгож хэлбэл, Г.Дамдинням сайд. Шатахуун түгээх станцуудын ихэнх нь хаалт татчихсан, байхгүй. Шатахуун түлш байгаа нь урт дараалал үүсчихсэн, үүнээс үүдсэн түгжрэлээс эхлээд бухимдал дүүрэн. Өдөр тутмын гол хэрэглээг нь авчирч өгөхгүй болохоор бухимдахгүй яах юм.

Олон жил ОХУ-аас асуудалгүй татаж ирсэн нефтийн бүтээгдэхүүн Г.Дамдиннямын үед л ийн урт хугацаанд тасалдаж байна. Удахгүй салбарын сайд шатахуун, түлштэй зууралдсаар байтал Г.Занданшатарын Засгийн газраас хөөгдөх үү, эсвэл энэ засгаа татаж унагаах гол шалтгаан болно.

Эмзэг хэврэг, богино настай Засгийн газрын насыг улам бүр багасгаж байгаа хүн бол Г.Дамдинням. Алхам тутмын хэрэглээ болсон шатахуун, түлш бол нийгмийн хамгийн эмзэг зүйл. Иргэн бүр л хараана, зүхнэ. Ингэхдээ Аж үйлдвэр, эрдэс баялгийн сайдаа тэгтлээ харааж зүхэхгүй. Түүнд угаасаа харагдах, итгэх боломж байхгүй учраас Засгийн газар, Ерөнхий сайдтай л иргэд, бүлэглэлүүд ноцно. Үүгээрээ тэр бүлэглэлүүдэд таатай боломж тавьж өгч байна. Тиймдээ ч өчигдөр иргэд олон нийт Төрийн ордны гадна жагсан, эсэргүүцэл илэрхийлж байна. Ингэхдээ Засгийн газар огцрохыг шаардаж байна. Түүнээс Г.Дамдиннямд тэгтлээ хаяглахгүй байгааг ч анзаарч байгаа байх.

Дахин хэлэхэд Н.Учрал дарга, Г.Занданшатар сайд нар энэ сайдаа явуулахгүй бол МАН ч тэр, Засгийн газар ч арчаагүй дорой харагдаж байна. Нефть бол стратегийн бүтээгдэхүүн. Тиймээс үүнд Үндэсний аюулгүй байдлын зөвлөл ч анхаарч ирсэн. Энэ утгаараа Үндэсний аюулгүй байдлын зөвлөлийн тэргүүн, Ерөнхийлөгч хүртэл энэ сайдад анхаарлаа хандуулах ёстой. Ерөөсөө Г.Дамдиннямыг зайлуулахгүй бол нийгмийн бухимдал зад татлаа.

Tumen.mn