Багш, эмч нарын цалингийн нэмэгдэл, цалин олгох системийг шинэчлэхтэй холбоотой шаардлагыг Ерөнхий сайд Г.Занданшатарт /2026-01-28/-нд хүргүүлсэн. Хариуг өнөөдөр буюу /2026-02-02/-ны дотор ирүүлэхийг хүсэж, тэмцлийн дараагийн хэлбэрт шилжихэд бэлэн байгаагаа мэдэгдсэн билээ.

Шаардлагыг тодруулбал, "МҮЭ-ийн холбооны гишүүн байгууллагууд болох Монголын Боловсрол, шинжлэх ухааны ҮЭ-ийн холбоо, Монголын Эрүүл мэндийн ажилтны ҮЭ-ийн холбоод нь салбарын ажилтнуудын хөдөлмөрийн үнэлэмжийг бодитой нэмэгдүүлэх чиглэлээр Засгийн газартай удаа дараа хэлэлцээ хийж, үндсэн цалинг нэмэгдүүлэх тухай шийдвэрт хүрсэн билээ. Гэвч хэрэгжилтийн шатанд Засгийн газрын тогтоолуудын уялдаа холбоогүй байдалд шалтгаалан ажилтнуудын бодит орлого өсөхгүй, харин ч хохирч буй ноцтой нөхцөл байдал үүсээд байна.

МҮЭ-ийн холбооноос дараах хууль бус зөрчлүүдийг яаралтай засаж, боловсрол, шинжлэх ухаан, эрүүл мэндийн салбарын ажилтнуудын эрх ашгийг хамгаалахыг шаардаж байна" хэмээсэн.

Уг шаардлагад Ерөнхий сайд Г.Занданшатар хариу өгөх эсэх нь одоогоор хүлээлттэй байгаа юм. Угтаа цалин нэмэгдүүлнэ гэж ажил хаялтыг зогсоож, төсвийн ерөнхийлөн захирагч нараас 10 хувь танаж 618 тэрбумыг төсөвт суулгасан. Улмаар Ерөнхий сайд Г.Занданшатар, Боловсролын сайд П.Наранбаяр хэн хэн нь 2026 оны нэгдүгээр сарын 1-ээс багш нарын цалин багадаа 30 хувь, ихдээ 79 хувиар нэмэгдэнэ гэж удаа дараа мэдэгдэж байв.

Гэтэл өдгөө Боловсролын яамнаас I сард амралт таардаг учир илүү цаг бараг байдаггүй гэх хариу өгөөд сууж байх юм. Энгийн жишээ дурдахад, СӨБ-ынхон нэгдүгээр сард амардаггүй. Гэтэл тэдний цалин ч гэсэн нэмэгдээгүй тухай шүүмжлэлүүд гарсаар байна.