Ц.Элбэгдорж: Ард түмний мөнгийг хулгайлж завшсан этгээдийг цаазлах хүртэл ялтай байсан

2014 оны 1 дүгээр сарын 1-ээс “Шилэн дансны тухай” хууль хэрэгжиж эхэлнэ. Энэ хуулийг хэрэгжүүлэхтэй холбогдуулан төрийн бүх шатны албан хаагчдын төлөөлөл, яам, агентлагийн удирдлагуудыг оролцуулсан “Шилэн дансны тухай хуулийн хэрэгжилт” сэдэвт зөвлөгөөн төрийн ордонд боллоо. Зөвлөгөөнийг нээж, Ерөнхийлөгчийн ахлах зөвлөх П.Цагаан үг хэлсэн юм.Тэрбээр, энэ хуулийн дагуу яам, агентлагууд вэб сайтаараа,нэг стандартаар санхүүгийн гүйлгээ, шилжүүлгээ ил тод, нээлттэй мэдээлнэ гэлээ. Цаашдаа “Шилэн данс” нэртэй нэгдсэн вэб сайтыг Сангийн яамны дэргэд ажиллуулж эхлэх ажээ.

Засгийн газрын Хэрэг эрхлэх газрын дарга С.Баярцогт хуулийн концепци, үрдүн, ач холбогдолын талаар дэлгэрэнгүй танилцууллаа. Шилэн дансны тухай хуулийг хэрэгжүүлээгүй тохиолдолд тооцох хариуцлагын тогтолцоо тодорхой байгаа гэдгийг тэр онцолсон юм.Мөн Мэдээллийн технологи, шуудан, харилцаа холбооны газрын дарга Ц.Жадамба удахгүй нээгдэх www.shilendans.gov.mn вэб сайтын талаар танилцуулж, энэ вэб сайтад төрийн байгууллагууд мэдээллээ хэрхэн байршуулахыг дэлгэрэнгүй тайлбарлав.

“Шилэн дансны тухай” хуулийн дагуу бүх шатны төрийн захиргааны байгууллага, агентлаг, хэлтэс 5 сая төгрөгөөс дээш үнийн дүнтэй гүйлгээ, зарцуулалт, тендер зарлах, шалгаруулах, үйлчилгээний орлого, зарлагуудыг ил тодоор мэдээлэх ажээ. Гэхдээ төрийн нууцтай холбоотой зарим гүйцэтгэх ажил эрхэлдэг байгууллагын ажилтайх олбоотой цөөн хэдхэн байгууллагын үйл ажиллагаа уг хуульд хамаарахгүй юм байна.

Ерөнхийлөгч Ц.Элбэгдорж зөвлөгөөний үеэр “Монголчууд эрт дээр үеэс, Их засаг хуулиндаа ард түмний мөнгийг завшсан ноёдыг шийтгэх, ард түмний мөнгийг хулгайлж, завшсан этгээдийг цаазлах хүртэл ялтай байсан. Хувьсгалын үед ч гэсэн дайн, байлдааны үедч жирийн иргэдийн эд хөрөнгийг тонох, дээрэмдэхийг хориглодог байлаа. Шилэн данс бол энэ утгаараа Монголын төрийн уламжлал юм.Бид шинэ зүйл яриагүй. Уламжлалаа сэргээе гэж байгааюм. Энэ хуулийг хэрэгжүүлэх шууд үүрэг бүхий 5000 гаруй ажилтан байгаа. Эдгээр хүмүүс хуулийг сайн уншиж, судлах хэрэгтэй. Хуульд Засгийн газрын гадаад дотоод томилолтын зардал, төсвийн гүйцэтгэл, аудитын тайлан, Засгийн газрын гадаад дотоод өрийн дүн мэдээ, зарцуулалт, зардлын хэтрэлт, тайлбартайгаа багтах ёстой. Төрийн нууцыг байгууллагын нууцтай хольж болохгүй” гэж онцоллоо. Мөн “Энэ хуулийн хэрэгжилттэй цуг хариуцлагын тогтолцоо маш сайн хэрэгжих ёстой” гэдгийг Ерөнхийлөгч Ц.Элбэгдорж анхааруулав.