Өнөөдөр Нийслэлийн засаг дарга Х.Нямбаатараар ахлуулсан Нийслэлийн Хүүхдийн төлөө зөвлөл энэ оны анхдугаар хуралдаанаа зохион байгуулж, Нийслэлийн засаг даргын орлогч А.Амартүвшин 2026 оны ажлын төлөвлөгөөнд тусгахаар санаачилж буй ажлуудаа танилцууллаа.

Тус хуралдаанд ХГБХХЕГ-ын дарга Б.Баярсайхан болон холбогдох албан хаагчид оролцож, Монгол Улсын хүүхэд, гэр бүлийн хөгжил, хамгааллын бодлого, түүний хэрэгжилт, өнгөрсөн онд хэрэгжүүлсэн ажлууд, Нийслэл дэх хүүхэд, гэр бүлийн тулгамдсан асуудал, өнөөгийн нөхцөл байдлын талаарх мэдээллийг хүргэв.

Нийслэлийн Хүүхдийн төлөө зөвлөлийн 2026 оны төлөвлөгөөнд дараах ажлуудыг тусгуулахаар санал өглөө.

Зөвлөлийн гишүүн бүр байгууллагадаа хүүхэд хамгааллын жишиг бодлогыг хэрэгжүүлэх, үүнд зориулсан төсөв батлах;

Зөвлөл дэргэдээ хүүхдийн фонд бий болгох;

Цэцэрлэг, сургуулийн эцэг, эхийн зөвлөлөөр дамжуулж гэр бүлийг соён гэгээрүүлэх;

Хамтарсан багуудыг чадавхжуулах, дэмжих;

Хүүхэд, гэр бүлийн нийгмийн ажилтнуудыг чадавхжуулахад анхаарах, дэмжиж ажиллах;

Насан туршийн боловсролын төв, соёлын төвүүдэд хүний хөгжлийн зориулалтаар ашиглах;

Хүүхдэд ээлтэй хэвлэл мэдээллийн соёлыг түгээх;

Зуслангийн хөгжлийн хөтөлбөрийг хэрэгжүүлэх;

Дүүргүүдээс зарлагдаж буй тендэрт оролцогч байгууллага “Хүүхэд хамгааллын бодлого” баталсан, хэрэгжүүлсэн байх хуулийн хэрэгжилтийг шаардаж, мэдээллийг мэргэжлийн байгууллагад гаргаж ирүүлэх;

Шинээр барилга байгууламж, зам талбай ашиглалтад ороход Хүүхдийн эрхийн улсын байцаагч ажлын хэсгийн бүрэлдэхүүнд орж, хүүхдийн аюулгүй орчин, явган хүний зам талбайн ашиглалтын талаар дүгнэлт гаргах хуулийн зохицуулалтын хэрэгжилтийг хангах.