Ерөнхий сайд Н.Учрал, Зам, тээвэр хөгжлийн сайд Б.Дэлгэрсайхан, Монголын төмөр зам ТӨК-ийн Гүйцэтгэх захирал О.Батчулуун болон бусад албаны хүмүүс Багахангай-Хөшигийн хөндий-Эмээлт чиглэлийн төмөр замын төслийн талбайд ажиллалаа. Ингэхдээ тэд Багахангай өртөө болон төслийн 43 дугаар километрт байрлах 33 метрийн гүн ухмалын хэсэгт ажиллаж, бүтээн байгуулалтын явц, тулгамдаж буй асуудлыг газар дээр нь хэлэлцсэн юм.
Багахангай-Хөшигийн хөндий-Эмээлт чиглэлийн салбар төмөр замын эхний 87 км хэсгийн бүтээн байгуулалтын ажлын явцтай танилцаж, төмөр замын доод болон дээд бүтцийн үндсэн ажил дууссаны дараах эцсийн шатны ажлуудад хяналт тавьж, төслийн талбайд ажиллалаа.
Энэ үеэр Зам, тээвэр хөгжлийн сайд Б.Дэлгэрсайхан “Багахангай-Хөшигийн хөндий-Эмээлт чиглэлийн төмөр замын төслийн талбайд үндэсний 95 аж ахуйн нэгжийн 4000 орчим инженер техникийн ажилчид 24 цагаар ажиллаж байна. Төслийн эхний 87 км зам нь Улаанбаатар хотын Багахангай дүүргээс эхэлж, Төв аймгийн Сэргэлэн сумын нутгаар баруун тийш чиглэж буй маршрут үндсэндээ дуусаж, төмөр замыг ашиглалтад бэлтгэх сүүлийн шатны ажлууд дээр төвлөрч байна. Ажлаа дууссан компаниуд дараагийн хэсэгт шилжиж байгаа. Өнөөдөр Ерөнхий сайд төслийн талбайд ирж ажилласан нь хөрөнгө мөнгөнөөс эхлээд олон зүйл дээр анхаарч, цаашид гацаахгүй явах тал дээр анхаарлаа. Хөрөнгө мөнгийг хэд хэдэн эх үүсвэрээс бүрдүүлж байгаа. Одоо ажил гацахгүй” хэмээв.
Мөн үеэр Монголын төмөр зам ТӨХК-ийн Гүйцэтгэх захирал О.Батчулуун “Төсөлд нийт 1.9 их наяд төгрөгийн хөрөнгө оруулалт шаардлгатай. Одоо гацах зүйл байхгүй. Ингэснээр төслийн нэгдүгээр үе шатны эхний 87.8 км-ийн үндсэн бүтээн байгуулалт дуусаж, одоо төмөр замын чанар, технологийн шаардлагыг хангах, ашиглалтад бэлтгэх эцсийн шатны ажил үргэлжилж байна” гэлээ.
Шав тавьсан цагаасаа хойш чамгүй хүндрэл бэрхшээлтэй тулгарсан энэхүү бүтээн байгуулалтын ажил ийнхүү шуурхайлж байгаа нь үе үеийн Зам, тээвэр хөгжлийн сайдуудын хүчин зүтгэл, энэ жилээс бүр ч урамтай сайхан урагшилж байна гэдгийг инженер техникийн ажилчид болон гүйцэтгэгч компаниуд хэлж байлаа.

Tumen.mn