Монголын Үндэсний олимпийн хорооны дарга Д.Загдсүрэн нь 2014 оны нэгдүгээр сарын 27-ны өдөр Монгол Улсын шүүхээс албан тушаал эрхлэх эрхээ 2 жилээр хасуулж, жирийн дэглэмтэй хорих ангид 3 жил хорих ялаар шийтгүүлсэн ч Өршөөлийн хуульд хамрагдан, ялаас чөлөөлөгджээ. Тэрбээр хорооныхоо Захиргааны албаны даргаар ажиллаж байсан, хуулийн зөвлөх Б.Наранцэцэгтэй хамтран албан тушаалаа урвуулан ашиглаж, Олимпийн хороонд их хэмжээний хохирол учруулсан хэргээр шүүгджээ. Бүр тодруулбал Д.Загдсүрэн нь олимпийн хорооны 3.9 тэрбум төгрөгийг завшиж үрэгдүүлсэн, бусдад шилжүүлсэн нь баримтаар нотлогдож, шүүхээс ял сонссон аж. Харин тэр өнөөдөр ч Олимпийн хороог удирдсан хэвээр буй. Хоол идэж байгаа тогооноосоо чамгүй хэмжээний хөрөнгө завшиж, тэрийг нь хууль хяналтынхан тогтоож, бүр шүүхээс ял сонссон атлаа тэр одоо ч суудалдаа сууж байна.
а
Д.Загдсүрэн Тамирчдын нөхөх сэргээлтийн төвийн таван давхар барилгыг Б.Наранцэцэгийн үүсгэн байгуулсан "Тамирчдын нөхөн сэргээх сувилал" ХХК-ийн хөрөнгөөр барьсан мэтээр Олимпийн хорооны гүйцэтгэх зөвлөлийн гишүүдэд ойлгуулжээ. Ингээд зогсохгүй тус барилгыг 2011 оны 6 дугаар сарын 10-ны өдөр "Тамирчдын нөхөн сэргээх сувилал" ХХК-д шилжүүлсэн байна. Үнэн хэрэгтээ бол тус барилгыг Олимпийн хорооны 3.8 тэрбум төгрөгийн хөрөнгөөр барьсан аж. Ингэж тэрбээр албан тушаалаа ашиглан, бусадтай бүлэглэж, Олимпийн хорооны 3.8 тэрбум төгрөгийг завшиж үрэгдүүлжээ.
х
Түүний хийсэн бас нэг хууль бус үйлдэл. Д.Загдсүрэн Олимпийн хорооны гүйцэтгэх зөвлөлийн хурлаар хэлэлцүүлэхгүйгээр газар заржээ. Монголын Үндэсний олимпийн хорооны эзэмшлийн газраас 3600 м.кв буюу 47 сая 520 мянган төгрөгийн үнэтэй газрыг Нийслэл-Өргөө компанид хууль бусаар шилжүүлэн өгчээ. Ингэж тэр давтан үйлдлээр Монголын Үндэсний олимпийн хороонд онц их хэмжээний хохирол учруулсан байна.
х
Энэ бүхэн дүүргийн Эрүүгийн хэргийн анхан шатны хоёрдугаар шүүхийн шийтгэх тогтоолд дурдсан баримт. Энэхүү баримтыг өнөөдөр Хэвлэлийн хүрээлэнд хурал хийсэн спортын холбоодын төлөөлөл дэлгэсэн юм. Спортын 10 гаруй холбоо нэгдэж, Монголын олимпийн хөдөлгөөний нэр хүндийг унагааж, олон улсын олимпийн дүрмийг зөрчиж буй Д.Загдсүрэн гэх хүнтэй тэмцэхээр шийдсэнээ мэдэгдэв. Монголын олимпийн хороог 14 жил удирдаж байгаа Д.Загдсүрэн тамирчдын амжилтаар халхавч хийхээс өөрийг хийгээгүйг тэд дуулгав. Монголын чөлөөт бөхийн холбооны Ерөнхийлөгч Д.Дагвадорж "Тив, дэлхийд нэрээ дуурсгаж байгаа тамирчдын дээр хог шаар сууж байгаад уур хүрч байна. Загдсүрэнг буулгасан цагт л сэтгэл амарна" гэсэн байр суурийг илэрхийллээ. Мөн тэрбээр Д.Загдсүрэнгийн оронд Олимпийн хорооны дарга болох гэсэн санаа огтхон ч байхгүй гэдгийг цохон тэмдэглэж байв.
х
Монголын олимпийн хорооны гүйцэтгэх зөвлөлийн хурал маргааш болох аж. Тиймээс Олимпийн хорооны гүйцэтгэх зөвлөлд мэдэгдэл хүргүүлж, Д.Загдсүрэнгийн асуудлыг хэлэлцэхийг хүсээд буй аж. Олимпийн хорооны нийт 90 гишүүний 30 нь Загдсүрэнгийн гар хөл гэнэ. Тиймээс гүйцэтгэх зөвлөлийн хурлын шийдвэрт найдахгүй байгаагаа спортын холбоодын төлөөлөл хэлж байна. Гэхдээ тэдний тэмцэл Д.Загдсүрэнг Олимпийн хорооны даргын суудлаас буусан цагт дуусах гэнэ лээ.
Эх сурвалж: Dorgio,mn
