Эрүүл мэндийн салбар өнөөдөр бусад салбараас хамгийн хүнд байна. Эмнэлэгүүд нь ачааллаа даахаа болиод байгаа. Ялангуяа эхчүүд, хүүхдүүд эмнэлэгийн хонгилд шавааралдаад хэвтэж байна. Ийм үед эмч, сувилагч нар борив бохис хийлгүй ажиллаж буй. Гэтэл Чингэлтэй дүүргийн Эрүүл мэндийн төвийн дарга Ц.Лхагва мэтийн дарга нар нь цалингийн сангаасаа элдэв нэмэгдэл авч хууль бусаар цалинжиж байгаа ажээ. Энэ тухай хяналтын байгууллагад мэдэгдэж тэднийг шалгуулахыг хүссэн нягтлан бодогчоо өнгөрсөн хавар ажлаас халсан байв. Хууль зөрчсөн дарга нараа шалгуулах хүсэлт гаргасан нягтлан бодогчийг Б.Оюунгэрэл гэдэг. Тэрбээр шүүхээр заргалдаж явсаар саяхан ажилдаа буцаж оржээ. Шүүхийн шийдвэр түүний талд гарч, үнэдслэлгүйгээр ажлаас халагдсан нь тогтоогдсон юм. Гэвч ажилдаа буцаж орсоноос нь хойш Ц.Лхагва дарга нь түүнийг элдвээр дарамталж буй сурагтай.
Ц.Лхагва дарга их дураараа эр. Эмнэлэгийнх нь хүүхдийн тасагт олгосон “Соната-6” маркын автомашиныг тэр өөрийн хувийн унаа болгоод байна. Мөн эрүүл мэндийн төвийн удирдах ажилтнуудынхаа сарын цалинг үндэслэлгүйгээр нэмж олгосоор өнөөдөр цалингийн зардлаа хэтрүүлээд байгаа ажээ. Хуулийн зөвлөх гэгч нь тэтгэврийн насны хүн бөгөөд ажлын байрандаа сардаа ганц хоёр удаа үзэгдээд алга болдог гэнэ. Ийм хүнийг Ц.Лхагва дарга нь сард 630 мянгаар цалинжуулдаг юм байна. Түүнчлэн Ниймгийн эрүүл мэндийн тасгийн эрхлэгч Ц.Эрдэнэзаяа, Нийгмийн эрүүл мэндийн орлогч дарга н.Нямсүрэн зэрэг 10-аад хурган дарга нарт сар бүр үндсэн цалин дээр нь 100-150 мянган төгрөгийн нэмэгдлийг хууль бусаар олгожээ. Зургаан жил ажилласан н.Нямсүрэнг 25 жил ажилласан гэж хуурамчаар цалингийн шатлалыг өсгөж цалинжуулсан байна. Албан тушаалын цалингаасаа сар бүр 200 мянгаар илүү цалин авч байгаа дарганцар ч бас байдаг ажээ.
Энэ бүх булхайг илчилж, байгууллагадаа шударга харилцаа тогтоох гэж тэмцсэн нягтлан бодогчоо Ц.Лхагва дарга “Чи миний багт ажиллах боломжгүй хүн байна” хэмээн басамжлах нь “Бид хууль журамгүй улс” гэсэнтээ адилхан сонсогдож байна. Хамгийн харамсалтай нь энд нягтлан бодогчийн мэдээлэл, гомдолын мөрөөр мэргэжлийн хяналтын байгууллагаас шалгаж хууль бус явдлыг таслан зогсоосонгүй. Эмч, сувилагч нар нь ажил хүнд, цалин бага гэж гомдолловч эрүүл энхийн манаандаа махийтлаа зүтгэж байхад эмнэлэгийн захиргааны хэдэн дарга нар нь ийнхүү увайгаа алдаж, цалингийн сангаараа наргицгааж байна.
Б.Отгонбаяр
Эх сурвалж: Tumen.mn
