Үндсэн хуулийн цэцэд өгсөн гомдолын бичиг алга болчихжээ

Дорноговь аймгийн Мандах сумын нутаг дахь Цагаан суваргын орд бол зэс, алтны нэлээд их нөөцтэй газар. Тус ордыг 2007 оны УИХ-ын 27 дугаар тогтоолоор стратегийн ордын жагсаалтанд оруулжээ. Стартегийн ордыг ашиглахдаа төр 34 хувийг эзэмшихээр хуульчилсан байдаг. Гэвч өнгөрсөн зун, 7 дугаар сарын 1-ний өдрийн УИХ-ын хуралдаанаар энэ ордыг МАК компанид 100 хувь эзэмшүүлэхээр болсон юм. Иймээс уг ордыг тойрсон маргаан одоо болтол улс төрчдийн хэрүүлийн “алим” болсоор байна. УИХ-ын дэд дарга Л.Цог УИХ-ын тэрхүү шийдвэрийг эсэргүүцэж, Үндсэн хууль болон бусад хууль тогтоомжийг зөрчсөн гэж үзээд Үндсэн хуулийн цэцэд хандсан байлаа. Гэтэл Үндсэн хуулийн цэц өнөөг хүртэл Цагаан суваргын ордын асуудлыг авч хэлэлцсэнгүй. Энэ тухай манай сайтад “МАК-ынхан Үндсэн хуулийн цэцийг худалдаад авчихсан уу” гарчигтай өгүүлэл ч нийтлэгдсэн юм. Тэгвэл саяхан УИХ-ын дэд дарга Л.Цог “Үндсэн хуулийн цэцэд өгсөн Цагаан суваргын ордын талаарх миний өргөдөл гомдлыг хүлээж аваагүй гэж байна. Цэцэд өгөөд таван сар гаруй боллоо. Цэцийнхэн таны өгсөн тэр бичиг чинь манайд ирээгүй гэдэг хариу өгөөд байгаа нь их сонин санагдаж байна” гэлээ. УИХ-ын дэд даргын нэрийн өмнөөс Үндсэн хуулийн цэцэд илгээсэн бичиг хаашаа алга болсон байж таарах вэ. Бичиг хэрэг дээрээс нь хэн нэгэн этгээд хулгайлж аваад шатааж орхив уу. Энэ үнэхээр гайхмаар зүйл болжээ. Гэхдээ эндээс харин бид манай төрийн албаны бичиг хэргийн дэг журам завхарч дуусч буйг харж болохоор байна. Иргэд, төрийн албан ташаалтны өргөдөл гомдол, санал хүсэлтийг хүлээн авдаг, хуулийн хугацаанд нь шийдвэрлээд эргэж хариу өгдөг ёс горим гэж баймаар л юм. Үндсэн хуулийн цэцийн дарга, гишүүд нь Цагаан суваргын ордын маргааныг хуулийн хүрээнд хэлэлцэн шийдвэрлэхийг хүсэхгүй байгаа юм уу гэсэн хардлага ч төрж буй ажээ.