2012 оны ММСУХ-ны шилдэг салбар Завхан аймгийн Сонгино сумын “Сонгино хурд” МСУХ нь 2002 онд үүсгэн байгуулагдаж, өдгөө тэргүүнээр аймгийн Алдарт уяач Ч.Пүрэвхүү, дэд тэргүүнээр М.Баттөмөр, нарийн бичгийн даргаар сумын Засаг даргын орлогч А.Лхагва болон 20 тэргүүлэгч, 111 гишүүнтэйгээр үйл ажиллагаа явуулж байна. Тус холбоо нь хөдөө орон нутагт үндэсний морин спортыг хөгжүүлэн, хурдан морь уяж сойх эрдэм ухаан, ёс жудаг өв соёлыг түгээн дэлгэрүүлэх, сурталчлах, залуу хойч үедээ өвлүүлэн үлдээх, уралдаанч хүүхдүүдийн аюулгүй байдлыг урьдчилан хамгаалах үүднээс гэнэтийн ослын даатгалд бүрэн хамруулж, хамгаалалтын хувцас хэрэгслээр хангуулан, Үндэсний баяр наадмын тухай хууль, ММСУХ-ны дүрэм журмын дагуу хурдан морьдын уралдааны бэлтгэл ажлыг хангаж зохион байгуулан, уяачийн эрх ашгийг хамгаалж, тэдний хөдөлмөрийг үнэлэн улс, аймаг, сумын алдар цолонд тодорхойлон алдаршуулах, түүнчлэн нутгийн адууны үйлдэр угсаа /угшил/-г сайжруулах зэрэг ажлыг санаачлан, баяжуулан бусад салбар холбоодод үлгэр дууриал үзүүлэн ажилладаг юм.
“Сонгино хурд” МСУХ-ны тэргүүлэгчид санаачлан сум байгуулагдсаны түүхт 90 жилийн ойг угтаж уяачид, хурдан морины хорхойтон, адуунд элэгтэй түмэн олондоо зориулан “Уяачдын хийморийн өргөө” бариуллаа.
Өргөөний зураг, скизийг Сонгино сумын харьяат, зураач С.Ганзүг, барилга архитектурыг нутгийн уугуул Ш.Батхолбоо хийсэн бөгөөд Улаанбаатар хотод үйл ажиллагаа явуулдаг нутгийн уугуул Ч.Отгондаваа захиралтай “Гурван сайхан хайрхан” ХХК нийт 32 сая төгрөгийн төсвөөр барьж хүлээлгэн өгөв. Энэхүү өргөө нь 11 метрийн диаметртэй, канад технологиор Монголын эртний хаадын өргөөний хэлбэр, монгол гэрийн уламжлалт хэв маяг, загварыг хослуулан дотор тавилга, унь, тооно хаалга нь бүрэн сийлбэртэй, тулгуур хоёр баганы дотор талд хөхөл, сойлгыг нь боож шуусан азарга, их насны морины толгойг товойлгон сийлсэн нь өвөрмөц өнгө төрхийг харуулсан юм. Мөн цахилгаанаар шалнаасаа халдаг байдлаар халаалтыг шийджээ.
Адуугаа дээдэлж, хүндэлдэг морины хорхойтнууд, холбооны гишүүд, нутгийн ард иргэд, бизнес эрхлэгчдийн дэмжлэг хандиваар хийморийн өргөөг босгосны зэрэгцээ сумын баяр наадмын эхний өдөр буюу 2014.оны долдугаар сарын 17 -нд нээлтээ хийсэн нь уяачид, наадамчин олны талархлыг хүлээсэн. Энэхүү хийморийн өргөө баригдсанаар Монголын хурдан морь, адууны соёл, хөгжил дэвшил болон улс, аймаг, сумын хэмжээнд уяач, уралдаанч, морь сонирхогч ард олондоо зориулан хийсэн анхны бүтээн байгуулалтын ажил юм. Ингэснээр ММСУХ-ны салбар холбоод өөрийн эзэмшлийн ажлын байр, үл хөдлөх хөрөнгөтэй болоход үлгэр дуурайлал болж байна. Түүнчлэн уяачдын холбоо үйл ажиллагаагаа явуулахын зэрэгцээ сумын ард иргэдийн дунд шагайн харваа, шатар гэх мэт үндэсний тоглоом наадгай, хурим найр, хурал, сургалт, хүлээн авалт, мөн ерөнхий боловсролын сургуулийн сурагчдад Монголын нүүдэлчдийн соёл хурдан морины уралдаан, монгол ахуйг сурталчлан таниулах зэрэг арга хэмжээг зохион байгуулах олон талт байдлаар ашиглах боломжтойгоороо ард олны талархал, хүндэтгэлийг хүлээсэн бүтээн байгуулалт боллоо.
"Сонгино хурд" МСУХ-ын тэргүүн Ч.Пүрэвхүү
